ಜುಲೈ ಜಿಎಸ್‌ಟಿ ಸಂಗ್ರಹ 1.96 ಲಕ್ಷ ಕೋಟಿ: ಶೇ.7.5ರಷ್ಟು ಹೆಚ್ಚಳ

ನವದೆಹಲಿ: ಜುಲೈ ತಿಂಗಳಲ್ಲಿ ಭಾರತದಲ್ಲಿ 1.96 ಲಕ್ಷ ಕೋಟಿ ರೂ ಮೊತ್ತದ ಜಿಎಸ್​ಟಿ (GST) ಸಂಗ್ರಹವಾಗಿದೆ. ಕಳೆದ ವರ್ಷದ ಇದೇ ತಿಂಗಳಿಗೆ ಹೋಲಿಸಿದರೆ ಜಿಎಸ್​ಟಿ ಸಂಗ್ರಹ ಶೇ. 7.5ರಷ್ಟು ಹೆಚ್ಚಾಗಿದೆ. ಹಿಂದಿನ ತಿಂಗಳಾದ ಜೂನ್​ನಲ್ಲಿ 1.85 ಲಕ್ಷ ಕೋಟಿ ರೂ ಜಿಎಸ್​ಟಿ ವಸೂಲಿಯಾಗಿತ್ತು.

ಅದಕ್ಕೆ ಹೋಲಿಸಿದರೆ ಜುಲೈನಲ್ಲಿ ಅಲ್ಪ ಹೆಚ್ಚಳ ಆಗಿದೆ.

ಸದ್ಯ ಜುಲೈನಲ್ಲಿ ಸಂಗ್ರಹವಾದ 1.96 ಲಕ್ಷ ಕೋಟಿ ರೂ ಜಿಎಸ್​ಟಿ ಪೈಕಿ ಭಾರತದೊಳಗೆ ಸಂಗ್ರಹವಾದ ತೆರಿಗೆ 1.43 ಲಕ್ಷ ಕೋಟಿ ರೂ. ಕಳೆದ ವರ್ಷದ ಜುಲೈಗೆ ಹೋಲಿಸಿದರೆ ಇದರಲ್ಲಿ ಶೇ. 6.7ರಷ್ಟು ಹೆಚ್ಚು ಸಿಕ್ಕಿದೆ. ಇನ್ನು, ಆಮದು ವಸ್ತುಗಳಿಂದ ಸಿಕ್ಕ ಜಿಎಸ್​ಟಿ 52,712 ಕೋಟಿ ರೂ. ಹಿಂದಿನ ವರ್ಷದಕ್ಕಿಂತ ಇದು ಶೇ. 9.5ರಷ್ಟು ಹೆಚ್ಚಿದೆ.

ಜಿಎಸ್​ಟಿ ರೀಫಂಡ್ ಶೇ. 66 ಹೆಚ್ಚಳ

ಜುಲೈನಲ್ಲಿ 27,147 ಕೋಟಿ ರೂ ಮೊತ್ತದ ಜಿಎಸ್​ಟಿ ರೀಫಂಡ್ ಆಗಿದೆ. ಇದನ್ನು ಕಳೆದು ಉಳಿಯುವ ನಿವ್ವಳ ಜಿಎಸ್​ಟಿ ಆದಾಯವು 1.69 ಲಕ್ಷ ಕೋಟಿ ರೂ. ಕಳೆದ ವರ್ಷಕ್ಕೆ ಹೋಲಿಸಿದರೆ ನಿವ್ವಳ ತೆರಿಗೆ ಸಂಗ್ರಹ ಹೆಚ್ಚಾಗಿರುವುದು ಶೇ. 1.7 ಮಾತ್ರ. ಜುಲೈನಲ್ಲಿ ಅತ್ಯಧಿಕ ಜಿಎಸ್​ಟಿ ರೀಫಂಡ್ ಆಗಿರುವುದರಿಂದ ನಿವ್ವಳ ಜಿಎಸ್​ಟಿ ಪ್ರಮಾಣ ಕಡಿಮೆ ಆಗಿದೆ. ಆದರೆ, ರೀಫಂಡ್ ಶೇ 66ರಷ್ಟು ಹೆಚ್ಚಳ ಆಗಿರುವುದನ್ನು ಉದ್ಯಮ ವಲಯ ಸ್ವಾಗತಿಸಿದೆ. ಈ ರೀಫಂಡ್​ಗಳಿಂದಾಗಿ ಸಣ್ಣ ಉದ್ದಿಮೆಗಳಿಗೆ ಅನುಕೂಲವಾಗಿದೆ ಮತ್ತು ಪುಷ್ಟಿ ಸಿಕ್ಕಂತಾಗಿದೆ ಎನ್ನುವ ಅಭಿಪ್ರಾಯ ಇದೆ.

ಏಪ್ರಿಲ್​ನಲ್ಲಿ ದಾಖಲೆಯ ಜಿಎಸ್​ಟಿ ಕಲೆಕ್ಷನ್

2025ರ ಏಪ್ರಿಲ್ ತಿಂಗಳಲ್ಲಿ 2.37 ಲಕ್ಷ ಕೋಟಿ ರೂ ಜಿಎಸ್​ಟಿ ಸಂಗ್ರಹ ಆಗಿತ್ತು. 2024ರ ಏಪ್ರಿಲ್​ನಲ್ಲಿ ಸಿಕ್ಕಿದ್ದ ತೆರಿಗೆಗೆ ಹೋಲಿಸಿದರೆ ಶೇ. 12.6ರಷ್ಟು ಹೆಚ್ಚಿತ್ತು. ಈ 2.37 ಲಕ್ಷ ಕೋಟಿ ರೂ ಸಂಗ್​ರಹವು ಸಾರ್ವಕಾಲಿಕ ಗರಿಷ್ಠ ದಾಖಲೆ ಮಾಡಿದೆ.

11.78 ಲಕ್ಷ ಕೋಟಿ ರೂ ತೆರಿಗೆ ಸಂಗ್ರಹ ನಿರೀಕ್ಷೆ

ಪ್ರಸಕ್ತ ಹಣಕಾಸು ವರ್ಷದಲ್ಲಿ (2025-26) ಜಿಎಸ್​ಟಿ ಆದಾಯದಲ್ಲಿ ಶೇ. 11ರಷ್ಟು ಹೆಚ್ಚಾಗಬಹುದು. 11.78 ಲಕ್ಷ ಕೋಟಿ ರೂ ಸಂಗ್ರಹವಾಗಬಹುದು ಎಂದು ಬಜೆಟ್​ನಲ್ಲಿ ಅಂದಾಜಿಸಲಾಗಿತ್ತು. ಈ ತೆರಿಗೆ ಆದಾಯದಲ್ಲಿ ಕೇಂದ್ರದ ಜಿಎಸ್​ಟಿ ಮತ್ತು ಕಾಂಪೆನ್ಸೇಶನ್ ಸೆಸ್ ಒಳಗೊಂಡಿದೆ.