‘ಅತಿಥಿ ದೇವೋ ಭವ’ಕ್ಕೆ ಅಪಮಾನ: ಸೀಟಿಗಾಗಿ ಪರದಾಡಿದ ವಿದೇಶಿ ಪ್ರವಾಸಿಗೆ ನೆರವಾದ ಪೊಲೀಸರು

ನವದೆಹಲಿ: ಭಾರತದ ‘ಅತಿಥಿ ದೇವೋ ಭವ’ ಪರಂಪರೆಗೆ ವ್ಯತಿರಿಕ್ತವಾದ ಘಟನೆಯೊಂದು ಮುಜಫರ್‌ಪುರದಿಂದ ನವದೆಹಲಿಗೆ ತೆರಳುತ್ತಿದ್ದ ರೈಲಿನಲ್ಲಿ ನಡೆದಿದೆ. ಸಾಮಾನ್ಯ ಕೋಚ್‌ನಲ್ಲಿ (General Coach) ಸೀಟು ಕಾಯ್ದಿರಿಸಿದ್ದ ದಕ್ಷಿಣ ಕೊರಿಯಾದ ಪ್ರವಾಸಿಗನಿಗೆ ಕೆಲವು ಸ್ಥಳೀಯ ಯುವಕರು ಕುಳಿತುಕೊಳ್ಳಲು ಅವಕಾಶ ನೀಡದೆ ಸತಾಯಿಸಿದ ಪ್ರಸಂಗ ವರದಿಯಾಗಿದೆ.
ವಿದೇಶಿ ಪ್ರಯಾಣಿಕನು ತನ್ನ ಬಳಿ ಅಧಿಕೃತ ಟಿಕೆಟ್ ಮತ್ತು ಸೀಟು ಖಚಿತವಾಗಿದ್ದರೂ, ಅಲ್ಲಿ ಮೊದಲೇ ಕುಳಿತಿದ್ದ ಯುವಕರು ಜಾಗ ಬಿಟ್ಟುಕೊಡಲು ನಿರಾಕರಿಸಿದ್ದಾರೆ. ಇದರಿಂದಾಗಿ ವಿದೇಶಿ ಪ್ರವಾಸಿಗನು ಕೆಲಕಾಲ ಪರದಾಡುವಂತಾಯಿತು. ಈ ವಿಷಯ ರೈಲ್ವೆ ಸುರಕ್ಷತಾ ಪಡೆ (RPF) ಅಧಿಕಾರಿಗಳ ಗಮನಕ್ಕೆ ಬಂದ ಕೂಡಲೇ, ಅವರು ಸ್ಥಳಕ್ಕೆ ಧಾವಿಸಿ ಯುವಕರಿಗೆ ಎಚ್ಚರಿಕೆ ನೀಡಿದ್ದಾರೆ.

ಆರ್‌ಪಿಎಫ್ ಅಧಿಕಾರಿಯ ಕಟ್ಟುನಿಟ್ಟಿನ ಮಧ್ಯಪ್ರವೇಶದ ನಂತರ, ಕೊರಿಯನ್ ಪ್ರವಾಸಿಗನಿಗೆ ಮೀಸಲಾದ ಸೀಟನ್ನು ಕೊಡಿಸಲಾಗಿದೆ. ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಪ್ರವಾಸಿಗರ ಸುರಕ್ಷತೆ ಮತ್ತು ಸೌಜನ್ಯದ ಬಗ್ಗೆ ಸಾರ್ವಜನಿಕರು ಚರ್ಚೆ ನಡೆಸುತ್ತಿದ್ದಾರೆ. ಆರ್‌ಪಿಎಫ್ ಅಧಿಕಾರಿಯ ಸಮಯಪ್ರಜ್ಞೆಗೆ ಮೆಚ್ಚುಗೆ ವ್ಯಕ್ತವಾಗಿದೆ.