ಭಾರತದ ವೈಭವ್ ತನೇಜಾ ಅಮೇರಿಕಾ ಪಕ್ಷದ ಖಜಾಂಚಿಯಾಗಿ ಆಯ್ಕೆ

ಟೆಸ್ಲಾದ ಕಾರ್ಯನಿರ್ವಾಹಕ ಮತ್ತು ಮುಖ್ಯ ಹಣಕಾಸು ಅಧಿಕಾರಿಯಾಗಿರುವ ಭಾರತೀಯ ಮೂಲದ ವೈಭವ್ ತನೇಜಾ ಅವರನ್ನು ಎಲಾನ್‌ ಮಸ್ಕ್ ಅವರು ತಮ್ಮ ಹೊಸದಾಗಿ ಪ್ರಾರಂಭಿಸಲಾದ ಅಮೇರಿಕಾ ಪಕ್ಷದ ಖಜಾಂಚಿಯಾಗಿ ಆಯ್ಕೆ ಮಾಡಿದ್ದಾರೆ. ಪಕ್ಷವನ್ನು ನೋಂದಾಯಿಸಲು ಸಲ್ಲಿಸಿದ ದಾಖಲೆಗಳು ಭಾನುವಾರ ಆನ್‌ಲೈನ್‌ನಲ್ಲಿ ಕಾಣಿಸಿಕೊಂಡ ನಂತರ ಈ ಹೆಸರು ಬಹಿರಂಗವಾಗಿದೆ.

“ಬಿಗ್‌, ಬ್ಯೂಟಿಫುಲ್‌ ಬಿಲ್‌’ ಕುರಿತು ಡೊನಾಲ್ಡ್ ಟ್ರಂಪ್ ಮತ್ತು ರಿಪಬ್ಲಿಕನ್ ಪಕ್ಷದೊಂದಿಗೆ ಉಂಟಾದ ಭಿನ್ನಾಭಿಪ್ರಾಯದ ನಂತರ ಮಸ್ಕ್ ಹೊಸ ಪಕ್ಷವನ್ನು ಘೋಷಿಸಿದರು.

ಅಮೆರಿಕದ ಎರಡು ಪಕ್ಷಗಳ ವ್ಯವಸ್ಥೆಯನ್ನು ಪ್ರಶ್ನಿಸಲು ಹೊಸ ರಾಜಕೀಯ ಪಕ್ಷವನ್ನು ಪ್ರಾರಂಭಿಸುವುದಾಗಿ ಮಸ್ಕ್ ಈ ಹಿಂದೆ ಘೋಷಿಸಿದ್ದರು. ಅವರು ತಮ್ಮ ಸಾಮಾಜಿಕ ಮಾಧ್ಯಮ ವೇದಿಕೆ ಎಕ್ಸ್‌ನಲ್ಲಿ ಪಕ್ಷವನ್ನು ರಚಿಸಬೇಕೆ ಅಥವಾ ಬೇಡವೇ ಎಂಬುದರ ಕುರಿತು ಜನರ ಅಭಿಪ್ರಾಯಗಳನ್ನು ಸಂಗ್ರಹಿಸುವ ಸಮೀಕ್ಷೆಯೂ ಮಾಡಿದ್ದರು.

‘ಬಿಗ್‌, ಬ್ಯೂಟಿಫುಲ್‌ ಬಿಲ್‌’ ಕುರಿತು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ರಿಪಬ್ಲಿಕನ್ ಪಕ್ಷದೊಂದಿಗಿನ ದ್ವೇಷದ ನಂತರ ಮಸ್ಕ್ ಶನಿವಾರ ರಾತ್ರಿ ಔಪಚಾರಿಕವಾಗಿ ‘ಅಮೇರಿಕಾ ಪಾರ್ಟಿ’ ಎಂಬ ಹೊಸ ಪಕ್ಷವನ್ನು ಘೋಷಿಸಿದರು. ಸಾಮಾಜಿಕ ಮಾಧ್ಯಮಗಳಲ್ಲಿ ಪ್ರಸಾರವಾಗುತ್ತಿರುವ ಅಧಿಕೃತ ಫೆಡರಲ್ ಚುನಾವಣಾ ಆಯೋಗದ ಫಾರ್ಮ್ ಹಾಥಾರ್ನ್‌ನ 1 ರಾಕರ್ ರಸ್ತೆಯಲ್ಲಿರುವ ಪಕ್ಷದ ಪ್ರಧಾನ ಕಚೇರಿಯನ್ನು ಉಲ್ಲೇಖಿಸಿದೆ. ಈ ಫಾರ್ಮ್ ಎಲಾನ್‌ ಮಸ್ಕ್ ಅವರನ್ನು ಪಕ್ಷದ ಏಕೈಕ ಅಭ್ಯರ್ಥಿ ಎಂದು ಹೆಸರಿಸಿದೆ. ವೈಭವ್ ತನೇಜಾ ಅವರನ್ನು ದಾಖಲೆಗಳ ಪಾಲಕ ಮತ್ತು ಖಜಾಂಚಿ ಎಂದು ಪಟ್ಟಿ ಮಾಡಲಾಗಿದೆ. ಅವರ ಹೆಸರಿನೊಂದಿಗೆ ಟೆಕ್ಸಾಸ್ ವಿಳಾಸವೂ ಇದೆ.

ವೈಭವ್ ತನೇಜಾ ಯಾರು?

ವೈಭವ್ ತನೇಜಾ ಪ್ರಸ್ತುತ ಟೆಸ್ಲಾದಲ್ಲಿ ಮುಖ್ಯ ಹಣಕಾಸು ಅಧಿಕಾರಿ (ಸಿಎಫ್‌ಒ) ಹುದ್ದೆಯನ್ನು ಅಲಂಕರಿಸಿದ್ದಾರೆ. ಜ್ಯಾಕ್ ಕಿರ್ಖಾರ್ನ್ ನಿರ್ಗಮನದ ನಂತರ ಅವರು ಆಗಸ್ಟ್ 2023ರಲ್ಲಿ ಈ ಹುದ್ದೆಯನ್ನು ಅಲಂಕರಿಸಿದರು. ವೈಭವ್ ಭಾರತೀಯ ಮೂಲದ ಕಾರ್ಯನಿರ್ವಾಹಕರಾಗಿದ್ದಾರೆ. ಹಲವಾರು ವರ್ಷಗಳಿಂದ ಟೆಸ್ಲಾದ ಹಣಕಾಸು ಮತ್ತು ಲೆಕ್ಕಪತ್ರ ಕಾರ್ಯಾಚರಣೆಗಳನ್ನು ನಿರ್ವಹಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದಾರೆ. ತನೇಜಾ ಸೋಲಾರ್‌ಸಿಟಿಯಲ್ಲಿ ಹಣಕಾಸು ಪಾತ್ರವನ್ನು ಹೊಂದಿದ್ದರು. ನಂತರ 2017ರಲ್ಲಿ ಮಸ್ಕ್ ಅದನ್ನು ಪಡೆದ ನಂತರ, ವೈಭವ್ ಟೆಸ್ಲಾ ಸೇರಿದ್ದರು.

ವೈಭವ್ ಅವರು ಸಾರ್ವಜನಿಕರಲ್ಲಿ ಕಡಿಮೆ ಖ್ಯಾತಿಯನ್ನು ಕಾಯ್ದುಕೊಳ್ಳುವುದಕ್ಕೆ ಮತ್ತು ಅವರ ಸ್ಥಿರ ನಾಯಕತ್ವಕ್ಕೆ ಹೆಸರುವಾಸಿಯಾಗಿದ್ದಾರೆ. ಆದರೆ ಟೆಸ್ಲಾ ಅವರ ಹಣಕಾಸು ಕಾರ್ಯತಂತ್ರಗಳನ್ನು ಮೇಲ್ವಿಚಾರಣೆ ಮಾಡುವಲ್ಲಿ ಮಹತ್ವದ ಪಾತ್ರ ವಹಿಸಿದ್ದಕ್ಕಾಗಿ ಅವರು ಖ್ಯಾತಿ ಪಡೆದಿದ್ದಾರೆ. ತನೇಜಾ 1999ರಲ್ಲಿ ದೆಹಲಿ ವಿಶ್ವವಿದ್ಯಾಲಯದಿಂದ ಪದವೀಧರರಾಗಿದ್ದಾರೆ. ನಂತರ ಅವರು 2000ರಲ್ಲಿ ಇನ್‌ಸ್ಟಿಟ್ಯೂಟ್ ಆಫ್ ಚಾರ್ಟರ್ಡ್ ಅಕೌಂಟೆಂಟ್ಸ್ ಆಫ್ ಇಂಡಿಯಾ ಮೂಲಕ ಚಾರ್ಟರ್ಡ್ ಅಕೌಂಟೆಂಟ್ಸ್ ಪದವಿ ಪಡೆದರು.

2006ರಲ್ಲಿ ಅವರು ಯುನೈಟೆಡ್ ಸ್ಟೇಟ್ಸ್‌ನಲ್ಲಿ ಸರ್ಟಿಫೈಡ್ ಪಬ್ಲಿಕ್ ಅಕೌಂಟೆಂಟ್ (ಸಿಪಿಎ) ಕೂಡ ಗಳಿಸಿದರು. ತನೇಜಾ ಅವರು ಟೆಸ್ಲಾ ಇಂಡಿಯಾ ಮೋಟಾರ್ಸ್ ಮತ್ತು ಎನರ್ಜಿ ಪ್ರೈವೇಟ್ ಲಿಮಿಟೆಡ್‌ನಲ್ಲಿ ನಿರ್ದೇಶಕರಾಗಿದ್ದಾರೆ. ಅಲ್ಲಿ ಅವರು ಭಾರತೀಯ ಮಾರುಕಟ್ಟೆಯಲ್ಲಿ ಟೆಸ್ಲಾ ಬೆಳವಣಿಗೆಯ ಕಾರ್ಯತಂತ್ರಕ್ಕೆ ಕೊಡುಗೆ ನೀಡುತ್ತಿದ್ದಾರೆ ಎಂದು ಹೇಳಲಾಗುತ್ತದೆ.