ಭಾರತ ಎಎಂಸಿಎ ಯೋಜನೆಗೆ ಅನುಮೋದನೆ, ಪಾಕ್‌ಗೆ ಚೀನಾ 40 ಜೆ-35 ಪೂರೈಕೆ ಸಜ್ಜು

ಬೀಜಿಂಗ್‌: ಭಾರತವು ತನ್ನದೇ ಆದ ಸ್ಟೆಲ್ತ್ ಫೈಟರ್‌ ಜೆಟ್‌ ನಿರ್ಮಿಸುವ ಯೋಜನೆಗೆ ಇತ್ತೀಚೆಗೆ ಅನುಮೋದನೆ ನೀಡಿದೆ. ಈ ಬೆನ್ನಲ್ಲೇ ಚೀನಾ ದೇಶವು ಪಾಕಿಸ್ತಾನಕ್ಕೆ 40 ಜೆ-35 5ನೇ ತಲೆಮಾರಿನ ಸ್ಟೆಲ್ತ್ ಫೈಟರ್ ಜೆಟ್‌ ಪೂರೈಸಲಿದೆ ಎಂದು ವರದಿಯಾಗಿದೆ. ಈ ಮೂಲಕ ಸ್ಟೆಲ್ತ್‌ ತಂತ್ರಜ್ಞಾನ ನಿರ್ವಹಿಸುವ ಕೆಲವೇ ದೇಶಗಳ ಗುಂಪಿಗೆ ಸೇರಲು ಪಾಕ್‌ ಸಜ್ಜಾಗಿದೆ.

5ನೇ ತಲೆಮಾರಿನ ಸ್ಟೆಲ್ತ್‌ ಫೈಟರ್‌ ಜೆಟ್‌ ನಿರ್ಮಿಸುವ ಯೋಜನೆಗೆ ಕೆಲ ದಿನಗಳ ಹಿಂದೆಯಷ್ಟೇ ರಕ್ಷಣಾ ಸಚಿವ ರಾಜನಾಥ್‌ ಸಿಂಗ್‌ ಅನುಮೋದನೆ ನೀಡಿದ್ದರು. ಇದು ಅವಳಿ-ಎಂಜಿನ್ ಹೊಂದಿರುವ 5ನೇ ತಲೆಮಾರಿನ ಮಿಲಿಟರಿ ವಿಮಾನವಾಗಿದೆ. ಈ ಕಾರ್ಯಕ್ರಮವನ್ನು ಸರ್ಕಾರಿ ಸ್ವಾಮ್ಯದ ಏರೋನಾಟಿಕಲ್ ಅಭಿವೃದ್ಧಿ ಸಂಸ್ಥೆ ಕಾರ್ಯಗತಗೊಳಿಸುತ್ತದೆ. ಆದ್ರೆ ಸ್ಟೆಲ್ತ್ ವಿಮಾನ – ಅಡ್ವಾನ್ಡ್‌ ಮೀಡಿಯಂ ಕಾಂಬ್ಯಾಟ್ ಏರ್‌ಕ್ರಾಫ್ಟ್ಅನ್ನು ವಾಯುಪಡೆಗೆ ಸೇರಿಸಿಕೊಳ್ಳಲು ಕನಿಷ್ಠ 1 ದಶಕಗಳ ಕಾಲ ಸಮಯ ಬೇಕಾಗುತ್ತದೆ. ಎಲ್ಲವೂ ಅಂದುಕೊಂಡಂತೆ ನಡೆದ್ರೆ ಎಎಂಸಿಎ 2035ರ ವೇಳೆಗೆ ಭಾರತ ಸ್ಟೆಲ್ತ್‌ ಫೈಟರ್‌ ಜೆಟ್‌ ನಿರ್ಮಿಸುವ ಯೋಜನೆ ಪೂರ್ಣಗೊಳ್ಳಲಿದೆ.

ಈ ಹೊತ್ತಿನಲ್ಲೇ ಚೀನಾ, ಪಾಕಿಸ್ತಾನಕ್ಕೆ 40 ಸ್ಟೆಲ್ತ್‌ ಫೈಟರ್‌ ಜೆಟ್‌ಗಳನ್ನು ಪೂರೈಸಲು ಮುಂದಾಗಿದೆ ಎಂಬ ವರದಿ ಹೊರಬಿದ್ದಿದೆ. ಈ ಕುರಿತು ಮಾಜಿ ಐಎಎಫ್ ಫೈಟರ್ ಪೈಲಟ್ ಮತ್ತು ರಕ್ಷಣಾ ವಿಶ್ಲೇಷಕ ಗ್ರೂಪ್ ಕ್ಯಾಪ್ಟನ್ ಅಜಯ್ ಅಹ್ಲಾವತ್ (ನಿವೃತ್ತ) ಮಾತನಾಡಿದ್ದು, ಚೀನಾದಲ್ಲಿ ಪಾಕಿಸ್ತಾನಿ ಫೈಟರ್‌ ಪೈಲಟ್‌ಗಳಿಗೆ ಈಗಾಗಲೇ ಸ್ಟೆಲ್ತ್‌ ಜೆಟ್‌ಗಳ ತರಬೇತಿ ನೀಡುತ್ತಿರುವುದನ್ನು ಖಚಿತಪಡಿಸಿದ್ದಾರೆ.

ಮುಂದುವರಿದು.. ಪಾಕಿಸ್ತಾನ ಈ ಜೆಟ್‌ ಸ್ವೀಕರಿಸೋದ್ರಲ್ಲಿ ಅಚ್ಚರಿ ಏನಿಲ್ಲ. ಈಗಾಗಲೇ ಪಾಕಿಸ್ತಾನದ ಫೈಟರ್‌ ಪೈಲಟ್‌ಗಳ ಒಂದು ಟೀಂ 6 ತಿಂಗಳಿಗಿಂತ ಹೆಚ್ಚು ಸಮಯದಿಂದ ಚೀನಾದಲ್ಲಿದೆ. ಸ್ಟೆಲ್ತ್‌ ಜೆಟ್‌ಅನ್ನು ಸೇನೆಗೆ ಸೇರ್ಪಡೆಗೊಳಿಸುವುದಕ್ಕೂ ಮುನ್ನವೇ ತರಬೇತಿ ಪಡೆದುಕೊಳ್ಳಾಗುತ್ತಿದೆ. ಚೀನಾ FC-31 ಆವೃತ್ತಿಯ ಜೆಟ್‌ ನೀಡುತ್ತದೆ. ಇದು ಜೆ-35ನ ರೂಪಾಂತರವಾಗಿದೆ ಎಂದು ತಿಳಿಸಿದ್ದಾರೆ.

ಸದ್ಯ ಚೀನಾ ಪಾಕಿಸ್ತಾನಕ್ಕೆ ನೀಡಲು ಮುಂದಾಗಿರುವ ಜೆ-35 ಆವೃತ್ತಿಯ ಸಾಮರ್ಥ್ಯ ಪೀಪಲ್ಸ್ ಲಿಬರೇಶನ್ ಆರ್ಮಿ ನೇವಿ ಏರ್ ಫೋರ್ಸ್ (PLANAF)ನ ಮುಂಚೂಣಿ ವಿಮಾನಗಳಿಗಿಂತಲೂ ಕಡಿಮೆ ಇದೆ ಎಂದು ಹೇಳಲಾಗುತ್ತಿದೆ.

ಸ್ಟೆಲ್ತ್‌ ತಂತ್ರಜ್ಞಾನ ಅಂದ್ರೆ ಏನು?
ಸ್ಟೆಲ್ತ್ ತಂತ್ರಜ್ಞಾನ ಅಂದ್ರೆ ಕಡಿಮೆ ಗೋಚರ ತಂತ್ರಜ್ಞಾನ. ಅಂದರೆ ಶತ್ರುಗಳ ಪತ್ತೆ ವ್ಯವಸ್ಥೆಗಳಾದ ರಾಡಾರ್, ಸೋನಾರ್‌ಗಳ ಕಣ್ತಪ್ಪಿಸುವ ತಂತ್ರಜ್ಞಾನ. ಮುಖ್ಯವಾಗಿ ಮಿಲಿಟರಿ ವ್ಯವಸ್ಥೆಗಳಾದ ಫೈಟರ್‌ ಜೆಟ್‌, ಹಡಗು ಮತ್ತು ಕ್ಷಿಪಣಿಗಳಿಗೆ ಈ ತಂತ್ರಜ್ಞಾನವನ್ನು ಅಳವಡಿಸಲಾಗುತ್ತದೆ.