ಭಾರತದಲ್ಲಿ ರೀಟೇಲ್ ಶಾಖೆಗಳನ್ನು ಮುಚ್ಚಲಿದೆ ಜರ್ಮನ್ ಮೂಲದ ಬ್ಯಾಂಕ್

ನವದೆಹಲಿ: ಜರ್ಮನಿ ಮೂಲದ ಡಾಯ್​ಶು ಬ್ಯಾಂಕ್ ಭಾರತದಲ್ಲಿರುವ ತನ್ನ ರೀಟೇಲ್ ಬ್ಯಾಂಕಿಂಗ್ ಬ್ಯುಸಿನೆಸ್ಅನ್ನು ಮಾರುವ ಆಲೋಚನೆಯಲ್ಲಿದೆ. ಈ ನಿಟ್ಟಿನಲ್ಲಿ ಪ್ರಯತ್ನಗಳೂ ಕೂಡ ನಡೆದಿವೆ. ರಾಯ್ಟರ್ಸ್ ಸುದ್ದಿ ಸಂಸ್ಥೆ ಬಿಡುಗಡೆ ಮಾಡಿರುವ ವರದಿ ಪ್ರಕಾರ, ತನ್ನ ಭಾರತೀಯ ರೀಟೇಲ್ ಬ್ಯುಸಿನೆಸ್​ಗಳನ್ನು ಮಾರುವ ಸಲುವಾಗಿ ಭಾರತವೂ ಸೇರಿದಂತೆ ವಿವಿಧ ದೇಶಗಳ ಬ್ಯಾಂಕುಗಳಿಂದ ಬಿಡ್ ಆಹ್ವಾನಿಸಿರುವುದು ತಿಳಿದುಬಂದಿದೆ.

ಡಾಯ್​ಶು ಬ್ಯಾಂಕ್ ತನ್ನ ರೀಟೇಲ್ ಬ್ಯುಸಿನೆಸ್ ಅನ್ನು ಹೆಚ್ಚು ಲಾಭದಾಯಕವಾಗಿ ಮಾಡುವ ಗುರಿ ಇಟ್ಟಿದೆ. ಸರಿಯಾಗಿ ಲಾಭ ತರದ ಬ್ಯಾಂಕ್ ಶಾಖೆಗಳನ್ನು ಮುಚ್ಚುವುದು ಸೇರಿದಂತೆ ವಿವಿಧ ಕ್ರಮಗಳನ್ನು ಈ ಜರ್ಮನ್ ಬ್ಯಾಂಕ್ ಕೈಗೊಳ್ಳುತ್ತಿದೆ. ಈ ವರ್ಷ 2,000 ಉದ್ಯೋಗಿಗಳನ್ನು ಕೆಲಸದಿಂದ ತೆಗೆಯುವ ಯೋಜನೆಯೂ ಇದರಲ್ಲಿದೆ.

ಭಾರತದಲ್ಲಿ ಡಾಯ್​ಶು ಬ್ಯಾಂಕ್ ತನ್ನ ರೀಟೇಲ್ ಸೆಕ್ಟರ್​ನಲ್ಲಿ 17 ಶಾಖೆಗಳನ್ನು ಹೊಂದಿದೆ. ಇಷ್ಟೂ ಬ್ಯಾಂಕ್ ಬ್ರ್ಯಾಂಚ್​ಗಳನ್ನು ಅದು ಮಾರಾಟ ಮಾಡಲು ಹೊರಟಿದೆ ಎಂದು ರಾಯ್ಟರ್ಸ್ ವರದಿಯು ಎರಡು ಮೂಲಗಳನ್ನು ಉಲ್ಲೇಖಿಸಿ ಮಾಹಿತಿ ನೀಡಿದೆ.

ಆದರೆ, ಡಾಯ್​ಶೆ ಬ್ಯಾಂಕ್​ನ ವಕ್ತಾರರು ಈ ಸುದ್ದಿಯನ್ನು ಅಲ್ಲಗಳೆದಿದ್ದಾರೆ. ಇದೆಲ್ಲವೂ ಊಹಾಪೋಹ ಮತ್ತು ಮಾರುಕಟ್ಟೆಯ ಗಾಳಿ ಸುದ್ದಿ ಎಂದು ವಕ್ತಾರರು ತಳ್ಳಿ ಹಾಕಿದ್ದಾರೆ. ರಾಯ್ಟರ್ಸ್​ಗೆ ಈ ಮಾರಾಟ ಪ್ರಯತ್ನದ ಬಗ್ಗೆ ಮಾಹಿತಿ ನೀಡಿರುವ ಎರಡು ಮೂಲಗಳು ಹೇಳುವ ಪ್ರಕಾರ, ಮಾರಾಟ ಸಂಬಂಧದ ಮಾತುಕತೆಗಳು ಇನ್ನೂ ಖಾಸಗಿಯಾಗಿ ಇರುವುದರಿಂದ ಸ್ಪಷ್ಟವಾಗಿ ಹೇಳಲು ಆಗುವುದಿಲ್ಲ

ಈ ಮೂಲಗಳ ಪ್ರಕಾರ, ಭಾರತದಲ್ಲಿರುವ ತಮ್ಮ ರೀಟೇಲ್ ಬ್ಯಾಂಕಿಂಗ್ ಬ್ಯುಸಿನೆಸ್​ಗೆ ಬಿಡ್​ಗಳನ್ನು ಸಲ್ಲಿಸಲು ಆಗಸ್ಟ್ 29ಕ್ಕೆ ಡೆಡ್​ಲೈನ್ ನಿಗದಿ ಮಾಡಲಾಗಿತ್ತು. ಆದರೆ, ಯಾವ್ಯಾವ ಬ್ಯಾಂಕುಗಳಿಂದ ಬಿಡ್ ಸಲ್ಲಿಕೆಯಾಗಿವೆ ಎಂಬುದು ಸದ್ಯಕ್ಕೆ ಸ್ಪಷ್ಟವಾಗಿಲ್ಲ ಎಂದು ರಾಯ್ಟರ್ಸ್ ವರದಿ ಹೇಳಿದೆ.