ಪ್ರಥಮ ತ್ರೈಮಾಸಿಕದಲ್ಲಿ ಜಿಡಿಪಿ ಶೇ. 6.8–7, ಆರ್‌ಬಿಐ ಗುರಿಗಿಂತ ಮೇಲು

ನವದೆಹಲಿ: ಭಾರತದ ಆರ್ಥಿಕ ಬೆಳವಣಿಗೆಯು ನಿರೀಕ್ಷೆ ಮೀರಿ ವೇಗ ಪಡೆದಿರುವ ಸಾಧ್ಯತೆ ಇದೆ ಎಂದು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ ವರದಿಯೊಂದು ಹೇಳಿದೆ. ಇದರ ವಿಶ್ಲೇಷಣೆಯ ಪ್ರಕಾರ ಪ್ರಸಕ್ತ ಹಣಕಾಸು ವರ್ಷದ ಮೊದಲ ಕ್ವಾರ್ಟರ್ ಆದ ಏಪ್ರಿಲ್​ನಿಂದ ಜೂನ್​ವರೆಗಿನ ಅವಧಿಯಲ್ಲಿ ಭಾರತದ ಜಿಡಿಪಿ ಬೆಳವಣಿಗೆ ಶೇ. 6.8ರಿಂದ ಶೇ. 7ರ ಆಸುಪಾಸಿನ ದರಲ್ಲಿ ಆಗಬಹುದು ಎಂದಿದೆ. ಆರ್​ಬಿಐ ಮಾಡಿದ ಅಂದಾಜು ಪ್ರಕಾರ ಮೊದಲ ಕ್ವಾರ್ಟರ್​ನಲ್ಲಿ ಜಿಡಿಪಿ ಶೇ. 6.5ರಷ್ಟು ಹೆಚ್ಚುವ ನಿರೀಕ್ಷೆ ಇತ್ತು. ಎಸ್​ಬಿಐ ಲೆಕ್ಕಾಚಾರದ ಪ್ರಕಾರ ಆರ್​ಬಿಐ ಅಂದಾಜಿಗಿಂತಲೂ ಉತ್ತಮ ಆರ್ಥಿಕ ಬೆಳವಣಿಗೆ ಈ ತ್ರೈಮಾಸಿಕದಲ್ಲಿ ಆಗಿರಬಹುದು.

ಏಪ್ರಿಲ್​ನಿಂದ ಜೂನ್​ವರೆಗಿನ ಕ್ವಾರ್ಟರ್​ನಲ್ಲಿ ಜಿಡಿಪಿ ಬೆಳವಣಿಗೆ ಶೇ. 6.9ರಷ್ಟು ಇರಬಹುದು. ಜಿವಿಎ ಶೇ. 6.5ರಷ್ಟಿರಬಹುದು ಎಂದು ಅಂದಾಜಿಸಲಾಗಿದೆ. ‘ಆರಂಭಿಕ ಅಂದಾಜುಪ್ರಕಾರ ಮೊದಲ ಕ್ವಾರ್ಟರ್​ನಲ್ಲಿ ಜಿಡಿಪಿ ಸುಮಾರು ಶೇ. 6.8ರಿಂದ ಶೇ. 7.0ರಷ್ಟು ಇರಬಹುದು’ ಎಂದು ಎಸ್​ಬಿಐ ಅನಾಲಿಸಿಸ್ ವರದಿಯಲ್ಲಿ ಹೇಳಲಾಗಿದೆ.

ಇಡೀ ವರ್ಷಕ್ಕೆ ಜಿಡಿಪಿ ಬೆಳವಣಿಗೆ ನಿರೀಕ್ಷೆಗಿಂತ ಕಡಿಮೆ?

ಮೊದಲ ಕ್ವಾರ್ಟರ್​ನಲ್ಲಿ ಆರ್​ಬಿಐ ಅಂದಾಜು ಮಾಡಿದ ಶೇ. 6.5ರ ದರಕ್ಕಿಂತಲೂ ಹೆಚ್ಚಿನ ಜಿಡಿಪಿ ಬೆಳವಣಿಗೆ ಆಗಬಹುದು ಎಂದು ಎಸ್​ಬಿಐ ವಿಶ್ಲೇಷಕರು ಹೇಳಿದ್ದಾರಾದರೂ, ಒಟ್ಟಾರೆ ಪ್ರಸಕ್ತ ಹಣಕಾಸು ವರ್ಷದ ಬೆಳವಣಿಗೆಯು ಕಡಿಮೆ ದಾಖಲಾಗಬಹುದು ಎಂದಿದ್ದಾರೆ.

ಆರ್​ಬಿಐ ಮಾಡಿದ ಅಂದಾಜು ಪ್ರಕಾರ 2025-26ರಲ್ಲಿ ಜಿಡಿಪಿ ಶೇ. 6.5ರಷ್ಟು ಹೆಚ್ಚುವ ನಿರೀಕ್ಷೆ ಇತ್ತು. ಆದರೆ, ಎಸ್​ಬಿಐ ಮಾಡಿದ ಅಂದಾಜು ಪ್ರಕಾರ ಈ ವರ್ಷದ ಆರ್ಥಿಕ ಬೆಳವಣಿಗೆ ಶೇ. 6.3ಕ್ಕೆ ಸೀಮಿತಗೊಳ್ಳಬಹುದು.

ಹಣದುಬ್ಬರ ಬಹಳ ಕಡಿಮೆ ಮಟ್ಟದಲ್ಲಿರುವುದರಿಂದ ನಾಮಿನಲ್ ಜಿಡಿಪಿ ಮತ್ತು ರಿಯಲ್ ಜಿಡಿಪಿ ನಡುವಿನ ಅಂತರ ಕಡಿಮೆ ಆಗಿದೆ. ಮೊದಲ ಕ್ವಾರ್ಟರ್​ನಲ್ಲಿ ರಿಯಲ್ ಜಿಡಿಪಿ ಶೇ. 6.5ರಿಂದ ಶೇ. 7.0ರಷ್ಟು ಇರಬಹುದು. ನಾಮಿನಲ್ ಜಿಡಿಪಿ ಶೇ. 8ರಷ್ಟಿರಬಹುದು ಎಂದು ಎಸ್​ಬಿಐ ಅನಾಲಿಸಿಸ್ ಹೇಳಿದೆ.