ಮಾಜಿ ಬ್ರಿಟಿಷ್ ಪ್ರಧಾನಿ ರಿಷಿ ಸುನಕ್ ಗೋಲ್ಡ್‌ಮನ್ ಸ್ಯಾಚ್ಸ್‌ಗೆ ‘ಹಿರಿಯ ಸಲಹೆಗಾರ’ರಾಗಿ ಮರುಪ್ರವೇಶ!

ಬ್ರಿಟನ್‌ನ ಮಾಜಿ ಪ್ರಧಾನಿ, ಇನ್ಫೋಸಿಸ್ ಮುಖ್ಯಸ್ಥ ನಾರಾಯಣ ಮೂರ್ತಿ ಮತ್ತು ಸುಧಾ ಮೂರ್ತಿ ದಂಪತಿಯವರ ಅಳಿಯ ರಿಷಿ ಸುನಕ್ ಈಗ ಜಾಗತಿಕ ಹಣಕಾಸು ಕಂಪನಿಯೊಂದರಲ್ಲಿ ಹಿರಿಯ ಸಲಹೆಗಾರರಾಗಿ ಕೆಲಸಕ್ಕೆ ಸೇರಿಕೊಂಡದ್ದಾರೆ. ನ್ಯೂಯಾರ್ಕ್‌ನಲ್ಲಿರುವ ಜಾಗತಿಕ ಬ್ಯಾಂಕಿಂಗ್ ದೈತ್ಯ ಗೋಲ್ಡ್‌ಮನ್ ಸ್ಯಾಚ್ಸ್ ಮಂಗಳವಾರ ಮಾಜಿ ಬ್ರಿಟಿಷ್ ಪ್ರಧಾನಿ ರಿಷಿ ಸುನಕ್ ಕಂಪನಿಯಲ್ಲಿ ‘ಹಿರಿಯ ಸಲಹೆಗಾರ’ರಾಗಿ ಮರಳಿರುವುದನ್ನು ದೃಢಪಡಿಸಿದೆ.

ಇದಕ್ಕೂ ಮೊದಲು ರಿಷಿ ಸುನಕ್ ಈ ಕಂಪನಿಯಲ್ಲಿ ಇಂಟರ್ನ್ ಮತ್ತು ವಿಶ್ಲೇಷಕರಾಗಿ ಕೆಲಸ ಮಾಡಿದ್ದಾರೆ. ಇದೀಗ ಮತ್ತೊಮ್ಮೆ ತಮ್ಮ ಹಳೆ ಕಂಪನಿಗೆ ರಿಷಿ ಸುನಕ್ ಹಿಂದಿರುಗಿದ್ದಾರೆ.

ಸಿಇಒ ಡೇವಿಡ್ ಸೊಲೊಮನ್, ಸುನಕ್ ಈಗ ಪ್ರಪಂಚದಾದ್ಯಂತದ ಗ್ರಾಹಕರಿಗೆ ಪ್ರಸ್ತುತ ಮ್ಯಾಕ್ರೋ ಎಕನಾಮಿಕ್ ಮತ್ತು ಗ್ಲೋಬಲ್ ರಾಜಕೀಯ ಪರಿಸ್ಥಿತಿಯ ಬಗ್ಗೆ ಸಲಹೆ ನೀಡಲಿದ್ದಾರೆ ಎಂದು ಹೇಳಿದರು. ರಿಷಿ ಸುನಕ್ ಅವರ ಅನುಭವ ಅದ್ವಿತೀಯವಾದದ್ದು, ಅವರು ಜಾಗತಿಕ ದೃಷ್ಟಿಕೋನದಿಂದ ನಮಗೆ ಮತ್ತು ನಮ್ಮ ಗ್ರಾಹಕರಿಗೆ ಬುದ್ಧಿವಂತಿಕೆ ಮತ್ತು ಕಾರ್ಯತಂತ್ರದ ಸಲಹೆಯನ್ನು ನೀಡಲು ಸಾಧ್ಯವಾಗುತ್ತದೆ ಎಂದು ಡೇವಿಡ್ ಸೊಲೊಮನ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ರಾಜಕೀಯದಿಂದ ಮತ್ತೆ ಕಾರ್ಪೊರೇಟ್ ಕಡೆಗೆ ರಿಷಿ ಸುನಕ್ ಮರಳುವಿಕೆ

ರಿಷಿ ಸುನಕ್ ಅಕ್ಟೋಬರ್ 2022 ರಿಂದ ಜುಲೈ 2024 ರವರೆಗೆ ಬ್ರಿಟನ್‌ನ ಪ್ರಧಾನ ಮಂತ್ರಿಯಾಗಿ ಸೇವೆ ಸಲ್ಲಿಸಿದ್ದರು. ಇದಕ್ಕೂ ಮೊದಲು ಅವರು ಫೆಬ್ರವರಿ 2020 ರಿಂದ ಜುಲೈ 2022 ರವರೆಗೆ ಹಣಕಾಸು ಮಂತ್ರಿಯಾಗಿದ್ದರು. ರಿಷಿ ಸುನಕ್ ಅವರು 2015 ರಲ್ಲಿ ಸಂಸದರಾಗಿ ತಮ್ಮ ರಾಜಕೀಯ ಜೀವನವನ್ನು ಪ್ರಾರಂಭಿಸಿದ್ದಾರೆ. ಈಗಲೂ ರಿಚ್‌ಮಂಡ್ ಮತ್ತು ನಾರ್ತ್‌ಆಲರ್ಟನ್‌ನಿಂದ ಸಂಸದರಾಗಿದ್ದಾರೆ. ಆದಾಗ್ಯೂ, 2024 ರ ಸಾರ್ವತ್ರಿಕ ಚುನಾವಣೆಯಲ್ಲಿ ಕನ್ಸರ್ವೇಟಿವ್ ಪಕ್ಷವು ಇತಿಹಾಸದಲ್ಲಿಯೇ ಅತಿ ದೊಡ್ಡ ಸೋಲನ್ನು ಅನುಭವಿಸಿತು, ಆದರೆ ಸುನಕ್ ಮುಂದಿನ ಸಂಸತ್ತಿನ ಪೂರ್ಣ ಅವಧಿಯವರೆಗೆ ಸಂಸದರಾಗಿ ಉಳಿಯುವುದಾಗಿ ಚುನಾವಣೆಯ ಸಮಯದಲ್ಲಿ ಭರವಸೆ ನೀಡಿದ್ದರು.

ರಿಷಿ ಸುನಕ್, ಭಾರತದ ಪ್ರಸಿದ್ಧ ಉದ್ಯಮಿ ಮತ್ತು ತಂತ್ರಜ್ಞ ನಾರಾಯಣಮೂರ್ತಿ ಮತ್ತು ರಾಜ್ಯಸಭಾ ಸಂಸದೆ ಸುಧಾ ಮೂರ್ತಿ ಅವರ ಅಳಿಯ. ಇನ್ಫೋಸಿಸ್ ಸಂಸ್ಥಾಪಕ ನಾರಾಯಣಮೂರ್ತಿ ಅವರ ಪುತ್ರಿ ಅಕ್ಷತಾ ಅವರನ್ನು ಸುನಕ್ ವಿವಾಹವಾಗಿದ್ದಾರೆ.

ಗೋಲ್ಡ್‌ಮನ್ ಸ್ಯಾಚ್ಸ್‌ನೊಂದಿಗೆ ಹಳೆಯ ಸಂಬಂಧ

ಇದು ಗೋಲ್ಡ್‌ಮನ್ ಸ್ಯಾಚ್ಸ್‌ನಲ್ಲಿ ರಿಷಿ ಸುನಕ್ ಅವರ ಎರಡನೇ ಅವಧಿ. ಅವರು 2000 ರಲ್ಲಿ ಇಲ್ಲಿ ಬೇಸಿಗೆ ಇಂಟರ್ನ್ ಆಗಿ ಕೆಲಸ ಮಾಡಿದರು ಮತ್ತು ನಂತರ 2001 ರಿಂದ 2004 ರವರೆಗೆ ವಿಶ್ಲೇಷಕರಾಗಿ ಸೇರಿಕೊಂಡರು. ನಂತರ ಅವರು ಅಂತರರಾಷ್ಟ್ರೀಯ ಹೂಡಿಕೆ ಕಂಪನಿಯನ್ನು ಸಹ-ಸ್ಥಾಪಿಸಿದರು.

ಈಗ ರಿಷಿ ಸುನಕ್ ಏನು ಮಾಡುತ್ತಾರೆ?

ಈಗ ಸುನಕ್ ಕೋರ್ ಹಣಕಾಸು ಕಾರ್ಯತಂತ್ರಕ್ಕೆ ಸಂಬಂಧಿಸಿದ ವಿಷಯಗಳಲ್ಲಿ ಜಾಗತಿಕ ಗ್ರಾಹಕರಿಗೆ ಮಾರ್ಗದರ್ಶನ ನೀಡುತ್ತಾರೆ. ವಿಶೇಷವಾಗಿ, ಅವರು ಪ್ರಸ್ತುತ ಭೂ-ರಾಜಕೀಯ ಉದ್ವಿಗ್ನತೆ (ಉದಾ. ರಷ್ಯಾ-ಉಕ್ರೇನ್, ಚೀನಾ-ತೈವಾನ್, ಬ್ರಿಕ್ಸ್ vs ಅಮೇರಿಕಾ), ಮ್ಯಾಕ್ರೋ ಎಕನಾಮಿಕ್ ಅಸ್ಥಿರತೆ (ಉದಾ. ಜಾಗತಿಕ ಹಣದುಬ್ಬರ, ಬಡ್ಡಿದರಗಳ ನೀತಿ), ಬ್ರೆಕ್ಸಿಟ್ ನಂತರದ ಬ್ರಿಟನ್‌ನ ಆರ್ಥಿಕ ಪಾತ್ರ ಮುಂತಾದ ವಿಷಯಗಳ ಕುರಿತು ಗೋಲ್ಡ್‌ಮನ್ ಸ್ಯಾಚ್ಸ್‌ಗೆ ಕಾರ್ಯತಂತ್ರವನ್ನು ರೂಪಿಸಲು ಸಹಾಯ ಮಾಡುತ್ತಾರೆ.