ಮಲ್ಪೆ ಮೀನು ಮಾರುಕಟ್ಟೆಗೆ ಹೊರರಾಜ್ಯಗಳ ಮೀನಿನ ದಂಡು: ಆಳಸಮುದ್ರ ಮೀನುಗಾರಿಕೆ ನಿಷೇಧದಿಂದ ಬೆಲೆ ದುಪ್ಪಟ್ಟು!

ಮಲ್ಪೆ : ಮಲ್ಪೆಯ ಮೀನು ಮಾರುಕಟ್ಟೆಗೆ ಹೊರರಾಜ್ಯದ ಮೀನು ಇದೀಗ ಲಗ್ಗೆ ಇಟ್ಟಿದೆ.

ತಮಿಳುನಾಡು, ಒಡಿಶಾ ಮತ್ತು ಆಂಧ್ರಪ್ರದೇಶದಲ್ಲಿ ಈಗಾಗಲೇ ಯಾಂತ್ರಿಕ ಮೀನುಗಾರಿಕೆ ಆರಂಭಗೊಂಡಿದೆ. ಈ ಹಿನ್ನೆಲೆಯಲ್ಲಿ ಕೆಲವು ರಾಜ್ಯಗಳ ಮೀನುಗಳು ಮಲ್ಪೆ ಬಂದರಿನಲ್ಲಿ ಮಾರಾಟವಾಗುತ್ತಿವೆ.

ಕೇರಳದ ನಾಡದೋಣಿಯ ಮೀನುಗಳೂ ಇಲ್ಲಿಗೆ ಲಾರಿ ಮೂಲಕ ಬರುತ್ತಿದ್ದು, ಅವುಗಳು ಮಾರಾಟವಾಗುತ್ತಿವೆ. ಈ ಬಾರಿ ಆಂಧ್ರಪ್ರದೇಶ, ಒಡಿಶಾದಿಂದ ತಮಿಳುನಾಡಿಗಿಂತ ಹೆಚ್ಚಿನ ಪ್ರಮಾಣದಲ್ಲಿ ಮೀನು ಬಂದಿದೆ.
ಕರಾವಳಿಯಲ್ಲಿ ಕಡಲು ಪ್ರಕ್ಷುಬ್ದಗೊಂಡಿರುವುದರಿಂದ ನಾಡ ದೋಣಿ ಮೀನುಗಾರರಿಗೆ (ಡಿಸ್ಕೋ) ಸರಿಯಾಗಿ ಮೀನುಗಾರಿಕೆಗೆ ತೆರಳಲಾಗುತ್ತಿಲ್ಲ. ತೆರಳಿದರೂ ಸಮುದ್ರದಲ್ಲಿ ಸಾಕಷ್ಟು ಪ್ರಮಾಣದಲ್ಲಿ ಮೀನು ಸಿಗುತ್ತಿಲ್ಲ. ಹಾಗಾಗಿ ಹೊರರಾಜ್ಯಗಳ ಮೀನುಗಳಿಗೆ ಮಲ್ಪೆ ಬಂದರಿನಲ್ಲಿ ಭಾರೀ ಬೇಡಿಕೆ ಬಂದಿದೆ. ಇದೀಗ ಆಳಸಮುದ್ರ ಮೀನುಗಾರಿಕೆಗೆ ನಿಷೇಧ ಇರುವುದರಿಂದ ಮೀನಿನ ಬೆಲೆಯೂ ದುಪ್ಪಟ್ಟಾಗಿದೆ.

120 ಟನ್‌ ಮೀನು ಮಾರಾಟ
ಮಲ್ಪೆ ಬಂದರಿಗೆ ನಿತ್ಯವೂ 20ರಿಂದ 25 ಲಾರಿಗಳಲ್ಲಿ ಸುಮಾರು 100 ರಿಂದ 120 ಟನ್‌ಗಳಷ್ಟು ಮೀನುಗಳು ಬರುತ್ತಿದೆ. ರೆಬ್ಟಾಯಿ, ಬಂಗುಡೆ, ಬೂತಾಯಿ, ಸಿಗಡಿ, ಕೊಡ್ಡಯಿ, ಕೊಕ್ಕರ್‌, ಬಿಳಿ ಪಾಂಪ್ರಟ್‌, ಸಿಗಡಿ ಸೇರಿದಂತೆ ಚಿಲ್ಲರೆ ಮೀನುಗಳು ರಖಂ ಆಗಿ ಮಾರಾಟವಾಗುತ್ತಿದೆ. ಸ್ಥಳೀಯ ಮೀನುಗಾರರಲ್ಲದೆ ಕುಂದಾಪುರ, ಮಂಗಳೂರು, ಬಂಟ್ವಾಳ, ಕಾರ್ಕಳ, ಮೂಡಬಿದ್ರೆ, ಸಾಗರದಿಂದ ಬಂದ ಮೀನು ವ್ಯಾಪಾರಿಗಳು ಖರೀದಿಯಲ್ಲಿ ತೊಡಗುತ್ತಾರೆ.

ಮೀನಿನ ದರ
ಮಲ್ಪೆ ಬಂದರು ಮಾರುಕಟ್ಟೆಯಲ್ಲಿ ಮೀನನ್ನು ಅವಲಂಬಿಸಿ ದಿನಕ್ಕೊಂದು ದರ ನಿಗದಿಯಾಗುತ್ತದೆ. ಪ್ರಸ್ತುತ ಶನಿವಾರದಂದು ಮೀನಿನ ದರ ಹೀಗಿತ್ತು. 25 ಕೆ.ಜಿ.ಯ ಒಂದು ಬಾಕ್ಸ್‌ ರೆಬ್ಟಾಯಿ 2,000 -3,000 ರೂ., ಬೂತಾಯಿ 5,000 ರಿಂದ 6,000 ರೂ., ದೊಡ್ಡ ಕೊಡ್ಡಯಿ ಕೆ.ಜಿ.ಗೆ 300 ರೂ., ಸಣ್ಣ ಕೊಡ್ಡಯಿ 200ರೂ., ಸಿಗಡಿ (ಬಿಗ್‌) 450 ರಿಂದ 500ರೂ., ಸಿಗಡಿ (ತೆಂಬೆಲ್‌) 170ರಿಂದ 200 ರೂ., ಪರ್ಸಿನ್‌ ಬೋಟಿನ ಬಂಗುಡೆ ಕೆ.ಜಿ.ಗೆ 300-350, (ಒಂದು ಕೆ.ಜಿ.ನಲ್ಲಿ 5-6), ಒಡಿಶಾ, ಆಂಧ್ರದ ಆಳಸಮುದ್ರ ಸಿಗುವ (ಲೈಲ್ಯಾಂಡ್‌) ಬಂಗುಡೆಗೆ 180ರಿಂದ 200ರೂ., ಕೊಕ್ಕರ್‌ 350ರೂ., ಪಾಂಪ್ರಟ್‌ 1300ರಿಂದ 1500ರೂ.ಗೆ ಮಾರಾಟವಾಗುತ್ತಿದೆ