ಯುಪಿಐ ವಹಿವಾಟು ವಿಫಲವಾದರೆ ಈಗ ಬೇಗನೇ ರೀಫಂಡ್ – ಎನ್‌ಪಿಸಿಐ ಹೊಸ ನಿಯಮ ಜಾರಿ

ನವದೆಹಲಿ: ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಶನ್ ಸಂಸ್ಥೆ ನಾಳೆಯಿಂದ ಯುಪಿಐ ಟ್ರಾನ್ಸಾಕ್ಷನ್ಸ್ ಸಂಬಂಧ ಪರಿಷ್ಕೃತ ಚಾರ್ಜ್​ಬ್ಯಾಕ್ ನಿಯಮಗಳನ್ನು ಜಾರಿಗೆ ತರುತ್ತಿದೆ. ಈಗ ಗ್ರಾಹಕರಿಗೆ ಪಾವತಿ ಸಂಬಂಧದ ವ್ಯಾಜ್ಯಗಳಿಗೆ ಬೇಗ ಪರಿಹಾರ ಸಿಗುತ್ತದೆ. ಯುಪಿಐನಲ್ಲಿ ಹಣ ಕಳುಹಿಸಿದಾಗ ಬ್ಯಾಂಕ್ ಅಕೌಂಟ್​​ನಿಂದ ಹಣ ಕಟ್ ಆಗಿಯೂ ವಹಿವಾಟು ವಿಫಲವಾದ ಪ್ರಕರಣಗಳಿಗೆ ಸಂಬಂಧಿಸಿದ ನಿಯಮ ಇದು. ಹೊಸ ನಿಯಮದಿಂದ ಇನ್ಮುಂದೆ ನಿಮಗೆ ಬೇಗನೇ ರೀಫಂಡ್ ಸಿಗುತ್ತದೆ.

ಏನಿದು ಚಾರ್ಜ್​ಬ್ಯಾಕ್?

ಯುಪಿಐ ಬಳಕೆದಾರರು ಇನ್ನೊಬ್ಬ ವ್ಯಕ್ತಿಗೆ ಅಥವಾ ಬ್ಯುಸಿನೆಸ್​ಗೆ ಹಣ ಕಳುಹಿಸಿದಾಗ, ಬ್ಯಾಂಕ್ ಅಕೌಂಟ್​​ನಿಂದ ಹಣ ಕಡಿತಗೊಂಡರೂ ತಲುಪಬೇಕಾದವರಿಗೆ ಆ ಹಣ ತಲುಪದೇ ಹೋಗಬಹುದು. ಇಂಥ ನಿದರ್ಶನಗಳು ಬಹಳಷ್ಟಿವೆ. ಟ್ರಾನ್ಸಾಕ್ಷನ್ ಫೇಲ್ಡ್ ಎಂದು ಅಂತ್ಯಗೊಳ್ಳುವ ವಹಿವಾಟೂ ಸಾಕಷ್ಟಾಗುತ್ತವೆ. ಬ್ಯಾಂಕ್ ಖಾತೆಯಿಂದ ಕಡಿತಗೊಂಡ ಹಣವನ್ನು ರೀಫಂಡ್ ಮಾಡುವಂತೆ ಚಾರ್ಜ್​ಬ್ಯಾಕ್ ರಿಕ್ವೆಸ್ಟ್ ಮೂಲಕ ಮನವಿ ಸಲ್ಲಿಸಬಹುದು.

ಹಿಂದೆ ಬಳಕೆದಾರರು ಚಾರ್ಜ್​ಬ್ಯಾಕ್ ರಿಕ್ವೆಸ್ಟ್ ಎತ್ತಿದಾಗ ಅದಕ್ಕೆ ಪರಿಹಾರ ಸಿಗಲು ಐದಾರು ದಿನಗಳಾಗುತ್ತಿದ್ದುವು. ಈಗ ಒಂದು ಅಥವಾ ಎರಡು ದಿನದೊಳಗೆ ಪರಿಹಾರ ಸಿಗುವಂತೆ ನಿಯಮ ಮಾಡಲಾಗಿದೆ. ಚಾರ್ಜ್​ಬ್ಯಾಕ್ ರಿಕ್ವೆಸ್ಟ್ ಬಂದಾಗ ಬ್ಯಾಂಕುಗಳು ಈ ಮೊದಲು ಯುಪಿಐ ರೆಫರೆನ್ಸ್ ಕಂಪ್ಲೇಂಟ್ ಸಿಸ್ಟಂ ಮೂಲಕ ವೈಟ್​ಲಿಸ್ಟ್ ಮಾಡುವಂತೆ ಎನ್​ಪಿಸಿಐಗೆ ಮನವಿ ಮಾಡಬೇಕಿತ್ತು. ಒಟ್ಟಾರೆ ಪ್ರಕ್ರಿಯೆಯಲ್ಲಿ ಈ ಕ್ರಮವನ್ನು ಕೈಬಿಡಲಾಗುತ್ತಿದೆ. ಬ್ಯಾಂಕುಗಳು ನೇರವಾಗಿ ಇದನ್ನು ನಿರ್ವಹಿಸಲು ಸ್ವತಂತ್ರವಾಗಿರುತ್ತವೆ.

ವ್ಯಕ್ತಿಗೆ ಹಣ ರವಾನೆಯಾಗಲು ವಿಫಲವಾದಾಗ ರೀಫಂಡ್ ಪಡೆಯಲು ಬ್ಯಾಂಕುಗಳಿಗೆ ಒಂದು ದಿನ ಕಾಲಾವಕಾಶ ಕೊಡಲಾಗುತ್ತದೆ. ಇವತ್ತು ನೀವು ದೂರು ಕೊಟ್ಟರೆ ನಾಳೆಯೊಳಗೆ ಈ ವ್ಯಾಜ್ಯ ಬಗೆಹರಿಯಬೇಕು. ವರ್ತಕರಿಗೆ ಮಾಡಿದ ಪಾವತಿ ವಿಫಲವಾದಾಗ ರೀಫಂಡ್ ಕೊಡಲು ಎರಡು ದಿನ ಕಾಲಾವಕಾಶ ಕೊಡಲಾಗುತ್ತದೆ.

ಎನ್​​ಪಿಸಿಐ ಮಾಡಿದ ಈ ನಿಯಮವು ಯುಪಿಐ ಬಳಕೆದಾರರಿಗೆ ಅನುಕೂಲ ತರಲಿದೆ. ಕೆಲ ಅನಗತ್ಯ ಕ್ರಮ ರದ್ದುಪಡಿಸಿರುವುದರಿಂದ ಬ್ಯಾಂಕುಗಳೂ ಕೂಡ ತ್ವರಿತವಾಗಿ ವ್ಯಾಜ್ಯಕ್ಕೆ ಪರಿಹಾರ ಹುಡುಕಲು ಸಾಧ್ಯವಾಗುತ್ತದೆ.