ಇಪಿಎಫ್‌ಒ ವ್ಯಾಪ್ತಿ ವಿಸ್ತರಣೆ: ₹25,000ಕ್ಕೆ ಸಂಬಳದ ಮಿತಿ ಏರಿಕೆ?

ನವದೆಹಲಿ: ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ (EPFO) ಮತ್ತೊಮ್ಮೆ ತನ್ನ ನೀತಿಯಲ್ಲಿ ಕೆಲ ಬದಲಾವಣೆಗಳನ್ನು ಮಾಡಲು ಹೊರಟಿದೆ. ಇಪಿಎಫ್ ಮತ್ತು ಇಪಿಎಸ್​ಗೆ ಸಂಬಳದ ಮಿತಿಯನ್ನು (salary limit) 15,000 ರೂನಿಂದ 25,000 ರೂಗೆ ಏರಿಸುವ ಪ್ರಸ್ತಾಪವೊಂದು ಸರ್ಕಾರದ ಮುಂದಿದೆ. ಇದೇನಾದರೂ ಜಾರಿಗೆ ಬಂದಲ್ಲಿ ಹೆಚ್ಚಿನ ಉದ್ಯೋಗಿಗಳು ಇಪಿಎಫ್ ವ್ಯಾಪ್ತಿಗೆ ಬರಲಿದ್ದಾರೆ. ಹಾಗೆಯೇ, ಇಪಿಎಫ್ ಅಕೌಂಟ್​ಗಳಿಗೆ ಹೆಚ್ಚಿನ ಕೊಡುಗೆ ಸಿಗಲಿದೆ.

2014ಕ್ಕೆ ಮುಂಚೆ ಪಿಎಫ್​ಗೆ ಅರ್ಹರಾಗಲು ಸಂಬಳದ ಮಿತಿ 6,500 ರೂ ಇತ್ತು. 2014ರಲ್ಲಿ ಅದನ್ನು 15,000 ರೂಗೆ ಏರಿಸಲಾಯಿತು. ಇದರಿಂದಾಗಿ ಲಕ್ಷಾಂತರ ಉದ್ಯೋಗಿಗಳಿಗೆ ಇಪಿಎಫ್ ಭಾಗ್ಯ ಸಿಕ್ಕಂತಾಗಿತ್ತು. ಈಗ 25,000 ರೂಗೆ ಮಿತಿ ಹೆಚ್ಚಿಸಿದರೆ ಇನ್ನೂ ಹಲವಾರು ಉದ್ಯೋಗಿಗಳಿಗೆ ಇಪಿಎಫ್ ಸರ್ವಿಸ್​ನ ಅವಕಾಶ ಸಿಗುತ್ತದೆ.

ಇಪಿಎಫ್​ನಲ್ಲಿ ಸಂಬಳದ ಮಿತಿ ಹೇಗೆ ಕೆಲಸ ಮಾಡುತ್ತದೆ?

ಈಗ ಇಪಿಎಫ್​ಗೆ ಅರ್ಹತೆ ಪಡೆಯಲು ವೇತನ ಮಿತಿ 15,000 ರೂ ಇದೆ. ಮೂಲವೇತನ ಮತ್ತು ಭತ್ಯೆ ಎರಡೂ ಸೇರಿ ಮಾಸಿಕ 15,000 ರೂ ವೇತನ ಎಂದು ಮಿತಿ ಹಾಕಲಾಗಿದೆ. ಅಂದರೆ, ಈ 15,000 ರೂಗಿಂತ ಕಡಿಮೆ ವೇತನ ಇದ್ದವರಿಗೆ ಕಂಪನಿಗಳು ಇಪಿಎಫ್ ಅಕೌಂಟ್ ತೆರೆಯುವುದು ಕಡ್ಡಾಯ.

ಈ ಮಿತಿಗಿಂತ ಹೆಚ್ಚು ಸಂಬಳ ಇರುವ ಉದ್ಯೋಗಿಗಳಿಗೆ ಕಂಪನಿಗಳು ಇಪಿಎಫ್ ಅಕೌಂಟ್ ತೆರೆಯಬೇಕೆಂಬುದು ಕಡ್ಡಾಯವೇನಿಲ್ಲ. ಅದು ಐಚ್ಛಿಕ ಮಾತ್ರ. ಅಂದರೆ, ಕಂಪನಿ ಅಧಿಕ ಸಂಬಳದ ಉದ್ಯೋಗಿಗೆ ಅವರ ಅನುಮತಿ ಪ್ರಕಾರ ಇಪಿಎಫ್ ಅಕೌಂಟ್ ತೆರೆಯಬಹುದು ಅಥವಾ ತೆರೆಯದೇ ಇರಬಹುದು. ಅದನ್ನು ಪ್ರಶ್ನೆ ಮಾಡಲು ಆಗುವುದಿಲ್ಲ.

ಇಪಿಎಫ್​ನ ವೇತನ ಮಿತಿ ಹೆಚ್ಚಿಸಿದರೆ ಉದ್ಯೋಗಿಗೆ ಏನುಪಯೋಗ?

ಸದ್ಯ 15,000 ರೂ ವೇತನ ಮಿತಿಯಲ್ಲಿ ಕಂಪನಿಯು ಉದ್ಯೋಗಿಯ ಇಪಿಎಫ್ ಖಾತೆಗೆ ಶೇ. 12ರಷ್ಟು ಕೊಡುಗೆ ನೀಡುತ್ತದೆ. ಕಂಪನಿ ವತಿಯಿಂದ 1,800 ರೂ ಸಂದಾಯವಾಗುತ್ತದೆ. ಉದ್ಯೋಗಿಯ ಸಂಬಳ 15,000 ರೂಗಿಂತ ಹೆಚ್ಚಿದ್ದಾಗಲೂ ಕಂಪನಿಯ ಕೊಡುಗೆ 1,800 ರೂಗಿಂತ ಹೆಚ್ಚಿರುವಂತಿಲ್ಲ.

ಈಗ ವೇತನ ಮಿತಿಯನ್ನು 25,000 ರೂಗೆ ಏರಿಸಿದಲ್ಲಿ ಆಗ ಕಂಪನಿಯು ಕಡ್ಡಾಯವಾಗಿ ಮಾಡಬೇಕಾದ ಕೊಡುಗೆಯೂ ಏರುತ್ತದೆ. 25,000 ರೂಗೆ ಶೇ. 12 ಕೊಡುಗೆ ಎಂದರೆ 3,000 ರೂ ಆಗುತ್ತದೆ. 25,000 ರೂ ಹಾಗು ಹೆಚ್ಚಿನ ವೇತನ ಪಡೆಯುತ್ತಿರುವ ಉದ್ಯೋಗಿಗಳಿಗೆ ಕಂಪನಿ ಕಡೆಯಿಂದ ಸಿಗುವ ಮಾಸಿಕ ಕೊಡುಗೆ 1,800 ರೂನಿಂದ 3,000 ರೂಗೆ ಏರುತ್ತದೆ.