ರಜೆ ಕೇಳಿದ್ದಕ್ಕೆ ಚಾಲಕನಿಗೆ ಹಿಂಸೆ – ಉದ್ಯಮಿಯ ಅಮಾನವೀಯ ವರ್ತನೆ ವೈರಲ್

ರಜೆ ಕೇಳಿದ್ದಕ್ಕೆ ಉದ್ಯಮಿಯೊಬ್ಬರು ಚಾಲಕನಿಗೆ ಹಿಂಸೆ ನೀಡಿದ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ವಿಡಿಯೊದಲ್ಲಿ, ಉದ್ಯಮಿ, ಚಾಲಕನಿಗೆ ಜೋರಾಗಿ ಕಪಾಳಕ್ಕೆ ಹೊಡೆದುಕೊಳ್ಳುವಂತೆ ಸೂಚಿಸುತ್ತಿರುವುದು ಕೇಳಿಸುತ್ತದೆ. ಚಾಲಕ ನಿಧಾನವಾಗಿ ಹೊಡೆದುಕೊಂಡಾಗ, ಅಲ್ಲಿದ್ದ ಬೌನ್ಸರ್‌ನಿಂದ ಜೋರಾಗಿ ಹೊಡೆಸುವಂತೆ ಉದ್ಯಮಿ ಹೇಳುತ್ತಾನೆ.

ವಿಡಿಯೊದಲ್ಲಿ ಉದ್ಯಮಿಯ ಮುಖ ಸ್ಪಷ್ಟವಾಗಿ ಕಾಣಿಸದಿದ್ದರೂ, ಆತನ ಧ್ವನಿ ಸ್ಪಷ್ಟವಾಗಿ ಕೇಳಿಸುತ್ತದೆ. ಈ ಘಟನೆ ಭೋಪಾ ರಸ್ತೆಯಲ್ಲಿರುವ ಉದ್ಯಮಿಯ ಕಚೇರಿಯಲ್ಲಿ ನಡೆದಿದೆ ಎಂದು ವರದಿಯಾಗಿದೆ. ಕಾನ್ಪುರ ದೇಹಾತ್‌ನ ಮನೋಜ್ ಯಾದವ್ ಎಂಬ ಚಾಲಕನನ್ನು ಸುಮಾರು 20 ಬಾರಿ ತಾನೇ ಕಪಾಳಕ್ಕೆ ಹೊಡೆದುಕೊಳ್ಳುವಂತೆ ಬಲವಂತಪಡಿಸಲಾಗಿದೆ. ಆತ ಹೊಡೆದುಕೊಳ್ಳುವುದನ್ನು ನಿಲ್ಲಿಸಿದಾಗ, ಉದ್ಯಮಿ ತನಗೆ ಇನ್ನೂ ಮನಸ್ಸಿಗೆ ನೆಮ್ಮದಿ ಸಿಗಲಿಲ್ಲ ಎಂದು ಹೇಳುತ್ತಿರುವುದು ಕೇಳಿಸುತ್ತದೆ. ವಿಡಿಯೊದ ಉದ್ದಕ್ಕೂ ಅಸಭ್ಯ ಭಾಷೆಯನ್ನು ಸಹ ಬಳಸಲಾಗಿದೆ.

ತಾತನ ಅನಾರೋಗ್ಯದ ಕಾರಣದಿಂದ ಉದ್ಯಮಿಯಿಂದ ಹತ್ತು ಸಾವಿರ ರೂಪಾಯಿ ಸಾಲ ಪಡೆದಿದ್ದ ಮನೋಜ್ ರಜೆ ಕೇಳಿದ್ದೇ ಈ ಘರ್ಷಣೆಗೆ ಕಾರಣ ಎಂದು ಹೇಳಲಾಗಿದೆ. ಆದರೆ ಉದ್ಯಮಿ ಆತನನ್ನು ಕರೆಸಿ ಅವಮಾನಿಸಿದ್ದಾನೆ.

ಈ ವೈರಲ್ ವಿಡಿಯೊವನ್ನು ಆಲ್ ಡ್ರೈವರ್ ವೆಲ್ಫೇರ್ ಅಸೋಸಿಯೇಷನ್ ತೀವ್ರವಾಗಿ ಖಂಡಿಸಿದೆ. ಜಿಲ್ಲಾಧ್ಯಕ್ಷ ಪ್ರಿನ್ಸ್ ಯಾದವ್ ಅವರು ಇಂತಹ ವರ್ತನೆ ಸಂಪೂರ್ಣವಾಗಿ ಸ್ವೀಕಾರಾರ್ಹವಲ್ಲ ಎಂದು ಹೇಳಿದ್ದು, ಕ್ರಮ ಕೈಗೊಳ್ಳುವಂತೆ ಜಿಲ್ಲಾಧಿಕಾರಿ ಮತ್ತು ಎಸ್‌ಎಸ್‌ಪಿ ಅವರನ್ನು ಭೇಟಿ ಮಾಡುವುದಾಗಿ ತಿಳಿಸಿದ್ದಾರೆ.

ಈ ಮಧ್ಯೆ, ನ್ಯೂ ಮಂಡಿ ಪೊಲೀಸರು ವಿಡಿಯೊವನ್ನು ಗಮನಿಸಿದ್ದು ತನಿಖೆ ಆರಂಭಿಸಿದ್ದಾರೆ. ಯಾವುದೇ ಔಪಚಾರಿಕ ದೂರು ಸ್ವೀಕೃತವಾಗಿಲ್ಲ ಎಂದು ಸ್ಟೇಷನ್ ಇನ್‌ಚಾರ್ಜ್ ದಿನೇಶ್ ಚಂದ್ ಬಘೇಲ್ ತಿಳಿಸಿದ್ದು, ದೂರು ಬಂದ ನಂತರ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದ್ದಾರೆ.