ದೆಹಲಿ ಮೆಟ್ರೋ ದರ ಏರಿಕೆ: ಬೆಂಗಳೂರಿನಲ್ಲಿ ಆಕ್ರೋಶ, ದರ ಹೆಚ್ಚಳದಲ್ಲಿ ಭಾರೀ ವ್ಯತ್ಯಾಸ

ಬೆಂಗಳೂರು: ಇತ್ತೀಚೆಗೆ ಬೆಂಗಳೂರು ಮೆಟ್ರೋ ರೈಲು ದರವನ್ನ (Bengaluru Metro) ಭಾರಿ ಪ್ರಮಾಣದಲ್ಲಿ ಏರಿಕೆ ಮಾಡಲಾಗಿತ್ತು (Bengaluru Metro Price Hike). ಇದೀಗ ದೆಹಲಿಯಲ್ಲಿ 8 ವರ್ಷಗಳ ಬಳಿಕ ಮೆಟ್ರೋ ದರ ಹೆಚ್ಚಿಸಲಾಗಿದೆ. ಆದರೆ ದೆಹಲಿಯಲ್ಲಿ ಕನಿಷ್ಠ 1 ರೂಪಾಯಿಯಿಂದ ಗರಿಷ್ಠ 4 ರೂಪಾಯಿಯವರೆಗೆ ಮಾತ್ರ ಹೆಚ್ಚಿಸಲಾಗಿದೆ.

ದರ ಏರಿಕೆ ಬಳಿಕ ದೆಹಲಿ ಮೆಟ್ರೋದಲ್ಲಿ ಕನಿಷ್ಠ 11 ರೂ. ಹಾಗೂ ಗರಿಷ್ಠ ದರ 64 ರೂ. ಆಗಿದೆ. ಆದರೆ ದೆಹಲಿ ಮೆಟ್ರೋ ಏರಿಕೆಯ ಬೆನ್ನಲ್ಲೇ ಬೆಂಗಳೂರಿನ ಜನರು ಅನೇಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ..ದೆಹಲಿ ಮೆಟ್ರೋದಲ್ಲಿ ಬೆಲೆ ಏರಿಕೆಯನ್ನ ಅಷ್ಟು ಬೇಸಿಕ್‌ ಮಟ್ಟದಲ್ಲಿ ಮಾಡಿರುವಾಗ, ಬೆಂಗಳೂರಲ್ಲಿ ಯಾಕೆ ಮೆಟ್ರೋ ದರವನ್ನ ಈ ಪರಿ ಹೆಚ್ಚಿಸಲಾಗಿದೆ ಎಂದು ಪ್ರಶ್ನಿಸುತ್ತಿದ್ದಾರೆ.

ಫೆಬ್ರವರಿಯಲ್ಲಿ ಹೆಚ್ಚಳ

2025ರ ಫೆಬ್ರವರಿಯಲ್ಲಿ ಬೆಂಗಳೂರು ಮೆಟ್ರೋ ಟಿಕೆಟ್‌ ದರ ಹೆಚ್ಚಳವಾಗಿದೆ. ಇಲ್ಲಿ ದರವು ಕನಿಷ್ಠ 5 ರೂಪಾಯಿಯಿಂದ ಗರಿಷ್ಠ 30 ರೂಪಾಯಿವರೆಗೆ ಏರಿಕೆಯಾಗಿದೆ. ದೆಹಲಿಯ ಮೆಟ್ರೋ ದರ ಏರಿಕೆಯನ್ನು ನೋಡಿ ಬೆಂಗಳೂರಿನ ಪ್ರಯಾಣಿಕರು ಅಚ್ಚರಿಗೊಳಗಾಗಿದ್ದಾರೆ. ಬಿಎಂಆರ್‌ಸಿಎಲ್‌ ವಿರುದ್ಧ ಪ್ರಯಾಣಿಕರು ತೀವ್ರ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ದೆಹಲಿಯಲ್ಲಿ ಗರಿಷ್ಠ ಏರಿಕೆ ಕೇವಲ 4 ರೂಪಾಯಿ. ಆದರೆ ಬೆಂಗಳೂರಲ್ಲಿ ಗರಿಷ್ಠ ಬೆಲೆ ಏರಿಕೆ 30 ರೂಪಾಯಿ ಯಾಕೆ ಎಂದು BMRCL ವಿರುದ್ಧವೂ ಕಿಡಿಕಾರುತ್ತಿದ್ದಾರೆ. ದೆಹಲಿಯ ಗರಿಷ್ಠ ಟಿಕೆಟ್‌ ದರ 64 ರೂ. ಇದ್ದರೆ, ಬೆಂಗಳೂರಿನಲ್ಲಿ 90 ರೂ. ಇದೆ. ಇದು ಪ್ರಯಾಣಿಕರಿಗೆ ಭಾರಿ ಹೊರೆಯಾಗುತ್ತಿದೆ..

ಸಂಸದ ತೇಜಸ್ವಿ ಸೂರ್ಯ, ದೆಹಲಿ ಮೆಟ್ರೋ ದರ ಏರಿಕೆಯನ್ನು ಸಮಂಜಸ ಎಂದು ಪರಿಗಣಿಸುತ್ತಾರೆ, ಆದರೆ ಬೆಂಗಳೂರಿನ ದರ ಏರಿಕೆಯನ್ನು ತರ್ಕಬದ್ಧವಾಗಿಲ್ಲ ಎಂದು ಹೇಳಿದ್ದಾರೆ. ಅವರು ಬಿಎಂಆರ್‌ಸಿಎಲ್‌ ಶುಲ್ಕ ನಿಗದಿ ಸಮಿತಿಯ ವರದಿಯನ್ನು ಪ್ರಕಟಿಸದಿರುವುದನ್ನು ನಾಚಿಕೆಗೇಡಿನ ಸಂಗತಿ ಎಂದು ಕಿಡಿಕಾರಿದ್ದಾರೆ.ದೆಹಲಿಯ ಮೆಟ್ರೋ ದರ ಏರಿಕೆಯ ವಿವರಗಳು: 0-2 ಕಿ.ಮೀ – 10 ರೂ. (11 ರೂ.), 2-5 ಕಿ.ಮೀ – 20 ರೂ. (21 ರೂ.), 5-12 ಕಿ.ಮೀ – 30 ರೂ. (32 ರೂ.), 12-21 ಕಿ.ಮೀ – 40 ರೂ. (43 ರೂ.), 21-32 ಕಿ.ಮೀ – 50 ರೂ. (54 ರೂ.), 32 ಕಿ.ಮೀ – 60 ರೂ. (64 ರೂ.). ಬೆಂಗಳೂರಿನ ಮೆಟ್ರೋ ದರವು ದೆಹಲಿಯ ಮೆಟ್ರೋಗೆ ಹೋಲಿಸಿದರೆ ಶೇಕಡಾ 6 ಪಟ್ಟು ಹೆಚ್ಚು ಇದೆ. ಪ್ರಯಾಣಿಕರು, ಪೀಕ್‌ ಅವಧಿಯಲ್ಲಿ ರೈಲುಗಳ ಕೊರತೆಯನ್ನು ಮತ್ತು ದರ ಏರಿಕೆಯನ್ನು ಖಂಡಿಸುತ್ತಿದ್ದಾರೆ, ಇದರಿಂದಾಗಿ ಪ್ರಯಾಣಿಕರ ಸಂಖ್ಯೆಯು ಕಡಿಮೆಯಾಗುತ್ತಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.