ಬಿಗ್ ಬಾಸ್‌ ಪ್ರಥಮ್‌ಗೆ ಬೆದರಿಕೆ – ಆಡಿಯೋ ವೈರಲ್ ಬಗ್ಗೆ ರಕ್ಷಕ್‌ ಬುಲೆಟ್‌ ಸ್ಪಷ್ಟನೆ

ಬಿಗ್‌ ಬಾಸ್‌ʼ ಸ್ಪರ್ಧಿ ಪ್ರಥಮ್‌ಗೆ ದುಷ್ಕರ್ಮಿಗಳಿಂದ ಜೀವ ಬೆದರಿಕೆಯ ಘಟನೆಯೊಂದು ಇತ್ತೀಚೆಗೆ ಸುದ್ದಿಯಾಗಿದೆ. ಈ ಆಡಿಯೋ ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದೆ. ಈ ಘಟನೆಯಲ್ಲಿ ತಮ್ಮ ಹೆಸರು ಚರ್ಚೆಯಾಗಿರುವ ಬಗ್ಗೆ ರಕ್ಷಕ್‌ ಬುಲೆಟ್‌ ಇದೀಗ ಮಾಧ್ಯಮಗಳಿಗೆ ಸ್ಪಷ್ಟನೆ ನೀಡಿದ್ದಾರೆ.

ಅವತ್ತು ನಾನು ಅಲ್ಲಿ ಇದ್ದಿದ್ದು ಸತ್ಯ!

“ನಾನು ಒಂದು ಸೆಲೆಬ್ರಿಟಿ ಆದಮೇಲೆ ಒಂದು ಪೂಜೆಗೆ ಕರೀತಾರೆ, ನಾವು ಹೋಗಲೇ ಬೇಕು ಸಹಜ ನಾನು ಹೋಗಿದ್ದೇನೆ, ನಾನು ಇಲ್ಲ ಅಂತ ಹೇಳಲ್ಲ. ಆ ಜಾಗದಲ್ಲಿ ನಾನು ಇದ್ದಿದ್ದು ಸತ್ಯ. ನಾನು ಬೆದರಿಕೆ ಹಾಕಿಸಿದ್ದೇನೆ, ನಾನು ಸುಪಾರಿ ಕೊಟ್ಟಿದ್ದೇನೆ ಅಂತ ಒಂದಷ್ಟು ಕಡೆ ನೋಡಿದೆ. ನಾನು ರೌಡಿಸಂ ಮಾಡೋಕೆ ಅಥವಾ ಬೇರೆ ವ್ಯವಹಾರ ಮಾಡೋಕೆ ನಾನು ಇಲ್ಲಿ ಬಂದಿಲ್ಲ. ನಾನು ಮೇಕಪ್‌ ಹಾಕ್ತೇನೆ ನೀಯತ್ತಾಗಿ ಕೆಲಸ ಮಾಡ್ತೇನೆ ಅಷ್ಟೇ ನನ್ನ ಡ್ಯೂಟಿ” ಎಂದು ರಕ್ಷಕ್‌ ಹೇಳಿಕೊಂಡಿದ್ದಾರೆ.
ಈ ಘಟನೆಗೂ ನನಗೂ ಸಂಬಂಧವಿಲ್ಲ!

“ಇಲ್ಲಿ ನಾನು ಬೇರೆಯವರಿಗೆ ದಾಳಿ ಮಾಡೋದು ಆಗಲಿ, ಧಮ್ಕಿ ಹಾಕೋದು ಅಥವಾ ರೌಡಿಸಂ ಮಾಡೋದು ಆಗಲಿ, ಏನೋ ವೆಪನ್ಸ್‌ ತೋರಿಸಿದ್ರು ಅಂತೆಲ್ಲಾ ಹೇಳಿದ್ದಾರೆ. ಆದರೆ ನನಗೂ ಇದಕ್ಕೂ ಸಂಬಂಧ ಇಲ್ಲದೇ ಇರೋ ವಿಚಾರ. ಅವರನ್ನು ಹೇಗೆ ಕರೆದಿದ್ರೋ ನನ್ನನ್ನು ಅದೇ ರೀತಿ ಕರೆದಿದ್ರು, ಹೋದೆ ಊಟ ಮಾಡಿದೆ, ನಾನು ಆಚೆ ಬಂದೆ. ಅದಕ್ಕೂ ನನಗೂ ಸಂಬಂಧವಿಲ್ಲ. ಇಲ್ಲಿ ರಕ್ಷಕ್‌ ಇದ್ದ ಅನ್ನೋ ಒಂದು ವಿಚಾರ ಇಷ್ಟೆಲ್ಲಾ ಚರ್ಚೆ ಆಗ್ತಿದೆ” ಎಂದಿದ್ದಾರೆ ರಕ್ಷಕ್‌ ಬುಲೆಟ್.
ನಾವಿಬ್ಬರೂ ಫ್ಯಾಮಿಲಿ ಫ್ರೆಂಡ್ಸ್

“ನಾನು ಯಾವತ್ತಿಗೂ ಪ್ರಥಮ್‌ ಅವರನ್ನು ಅಣ್ಣ ಅಂತಲೇ ಕರೆಯುವುದು. ನಾನು ಅವರು ಫ್ಯಾಮಿಲಿ ಫ್ರೆಂಡ್ಸ್.‌ ಬೇರೆಯವರಿಗೆ ಪ್ರಾಬ್ಲಂ ಮಾಡಬೇಕು ಅನ್ನೋದಕ್ಕೆ ನಾನು ಇಲ್ಲಿ ಬಂದಿಲ್ಲ. ಕಲಾವಿದರ ಮನೆಯಿಂದ ಬಂದಿದೇವೆ. ನಾವು ಇಲ್ಲಿ ಕೆಲಸ ಮಾಡೋಕೆ ಅಂತ ಬಂದಿದ್ದೇವೆ. ಕೆಲಸ ಮಾತ್ರ ಮಾಡುತ್ತೇವೆ. ಇದರಲ್ಲಿ ನನ್ನದು ಏನೂ ಪಾತ್ರ ಇಲ್ಲ” ಎಂದು ರಕ್ಷಕ್‌ ಹೇಳಿದ್ದಾರೆ.

“ನಾನು ತಪ್ಪು ಮಾಡಿದ್ದೇನೆ, ಪ್ರಥಮ್‌ ಅಣ್ಣನಿಗೆ ನಾನು ಏನಾದರೂ ಪ್ರಾಬ್ಲಂ ಮಾಡಬೇಕು ಅಂತ ನಾನು ಹೊರಟಿದ್ದರೆ, ಆ ದೇವರು ನನಗೆ ಶಿಕ್ಷೆ ಕೊಡುತ್ತಾನೆ. ಅದನ್ನು ತೆಗೆದುಕೊಳ್ಳಲು ನಾನು ರೆಡಿಯಾಗಿದ್ದೇನೆ” ಎಂದು ರಕ್ಷಕ್‌ ಬುಲೆಟ್‌ ಹೇಳಿಕೊಂಡಿದ್ದಾರೆ.