ಸಿಟಿಕ್ಯಾಟ್ ಯಂತ್ರಗಳಿಂದ ಬೆಂಗಳೂರು ಫಳ ಫಳ; ಕಸದಿಂದ ಅನಿಲ-ವಿದ್ಯುತ್ ಉತ್ಪಾದನೆಗೆ ಯೋಜನೆ: ಡಿಕೆಶಿ

ಬೆಂಗಳೂರು: ನಗರದಲ್ಲಿ ಎಷ್ಟೇ ಸ್ವಚ್ಛ ಕಾರ್ಯ ನಡೆದರೂ ಸಹ ಮತ್ತೆ ಅಂದರೆ ಕೆಲವೇ ಕ್ಷಣದಲ್ಲಿ ಅದು ಗಲೀಜು ಆಗಿರುತ್ತದೆ. ಇದಕ್ಕೆ ಜನರ ಸಹಕಾರ ಅತ್ಯಗತ್ಯ. ನಮ್ಮೂರು, ನಮ್ಮ ನೆಲ ಎಂಬ ಭಾವನೆಯಿದ್ದರೆ ಈ ಸಮಸ್ಯೆ ಆಗುವುದಿಲ್ಲ. ಆದರೆ ಕೆಲವರು ಬೇಕಾಬಿಟ್ಟಿಯಾಗಿ ಇರುವು ಕಾರಣಕ್ಕೆ ಬೆಂಗಳೂರು ಅತಿಯಾದ ತ್ಯಾಜ್ಯವನ್ನು ಹೊಂದುವಂತೆ ಆಗಿದೆ.

ಆದರೆ ಇನ್ಮುಂದೆ ಕೆಲವು ರಸ್ತೆಗಳನ್ನು ಫಳ ಫಳ ಹೊಳೆಯುವಂತೆ ಮಾಡಲಿದೆ ಈ ಸಿಟಿ ಕ್ಯಾಟ್‌ ಯಂತ್ರ.

ಹೌದು, ನಗರದಲ್ಲಿ ಸ್ವಚ್ಛತೆ ಹೆಚ್ಚಿಸಲು ಹೊಸ ಸ್ವಿಟ್ಜರ್‌ಲ್ಯಾಂಡ್‌ನ ಸಿಟಿಕ್ಯಾಟ್ ಕಸ ಗುಡಿಸುವ ಯಂತ್ರವನ್ನು (Citycat garbage sweeper) ಪರಿಚಯಿಸಲಾಗಿದೆ ಎಂದು ಡಿಸಿಎಂ ಡಿ ಕೆ ಶಿವಕುಮಾರ್ (DCM DK Shivakumar) ಮಾಹಿತಿ ನೀಡಿದ್ದಾರೆ. ಈ ವಾಹನವು ಬೆಂಗಳೂರಿನ ಬೀದಿಗಳಲ್ಲಿ ಕೆಲಸ ಮಾಡಲು ಸಿದ್ಧವಾಗಿದ್ದು, ಇದು ಸ್ವಚ್ಛ ಮತ್ತು ಹಸಿರು ಭವಿಷ್ಯದ ಸಂಕೇತವಾಗಿದೆ ಎಂದು ಅವರು ಹೇಳಿದ್ದಾರೆ.

ಎತ್ತಿನಹೊಳೆ ನೀರು

ಇದೇ ಸಮಯದಲ್ಲಿ ಎತ್ತಿನ ಹೊಳೆ (Ettinahole) ನೀರಿನ ಬಗ್ಗೆಯೂ ಮಾತನಾಡಿದ್ದಾರೆ. 2027 ರ ವೇಳೆಗೆ ಕೋಲಾರಕ್ಕೆ ಎತ್ತಿನಹೊಳೆ ನೀರನ್ನು ತಲುಪಿಸಲಾಗುತ್ತದೆ ಎಂದಿದ್ದಾರೆ. ಈ ಯೋಜನೆ ಬಗ್ಗೆ ಪರಿಸರ ಇಲಾಖೆಯೊಂದಿಗೆ ಚರ್ಚೆ ನಡೆಸಲಾಗುತ್ತಿದೆ ಮತ್ತು ಶೀಘ್ರದಲ್ಲೇ ಪೂರ್ಣಗೊಳ್ಳಲಿದೆ ಎಂದು ತಿಳಿಸಿದ್ದಾರೆ.

ಕೋಲಾರಕ್ಕೆ ನೀರು

ಬೈರಗೊಂಡ ಮತ್ತು ಲಕ್ಕೇನಹಳ್ಳಿಯಲ್ಲಿ ಜಲಾಶಯ (Reservoir in Lakkenahalli) ನಿರ್ಮಾಣ ಕಾಮಗಾರಿಯ ಬಗ್ಗೆಯೂ ಸಹ ಅರಣ್ಯ ಇಲಾಖೆಯೊಂದಿಗೆ ಮಾತುಕತೆ ನಡೆಸಲಾಗಿದೆ. 2027 ರೊಳಗೆ ಕೋಲಾರಕ್ಕೆ ನೀರು ತಲುಪಿಸುವುದು ಸರ್ಕಾರದ ಗುರಿಯಾಗಿದ್ದು, ಯೋಜನೆಯು ಕುಡಿಯುವ ನೀರಿನ ಪೂರೈಕೆ ಮತ್ತು ಕೆರೆಗಳಿಗೆ ನೀರಿನ ಪೂರೈಕೆ ಮಾಡುವುದರ ಮೂಲಕ ಕಾರ್ಯಗತಗೊಳ್ಳಲಿದೆ ಎಂದಿದ್ದಾರೆ.

ಕಸ ವಿಲೇವಾರಿಗೆ ಹೊಸ ತಂತ್ರಜ್ಞಾನ

ಇನ್ನು ಕಸ ವಿಲೇವಾರಿ ಬಗ್ಗೆ ಮಾತನಾಡಿದ ಡಿಕೆಶಿ, ಹೊಸ ತಂತ್ರಜ್ಞಾನದ ಮೂಲಕ ದುರ್ವಾಸನೆ ಮುಕ್ತ ಕಸ ವಿಲೇವಾರಿ ಕೇಂದ್ರವನ್ನು ಸ್ಥಾಪಿಸಲು ಯೋಜನೆ ರೂಪಿಸಲಾಗಿದೆ. ಈ ಹೊಸ ಮಾದರಿಯಲ್ಲಿ, ಕಸದ ವಿಲೇವಾರಿ 10 ಎಕರೆ ಜಾಗದಲ್ಲಿ ನಡೆಯಲಿದೆ ಮತ್ತು ಇದರಿಂದ ವಿದ್ಯುತ್ ಮತ್ತು ಅನಿಲ ಉತ್ಪಾದನೆ ಮಾಡಲಾಗುತ್ತದೆ . ಇದು ಮೊದಲ ಪ್ರಯೋಗವಾಗಿದೆ. ಈ ಎಲ್ಲಾ ಯೋಜನೆಗಳು ಬೆಂಗಳೂರನ್ನು ಸ್ವಚ್ಛ ಮತ್ತು ಸ್ಮಾರ್ಟ್ ನಗರವಾಗಿ ಪರಿವರ್ತಿಸಲು ಸರ್ಕಾರದ ಪ್ರಯತ್ನವನ್ನು ಪ್ರತಿಬಿಂಬಿಸುತ್ತವೆ ಎಂದು ವಿವರಿಸಿದ್ದಾರೆ