ಬೆಂಗಳೂರು ವಿಮಾನ ನಿಲ್ದಾಣದ ಟರ್ಮಿನಲ್ 2ರಲ್ಲಿ ನೂತನ ಉದ್ಯಾನ ಗ್ಯಾಲರಿ ಲೋಕಾರ್ಪಣೆ: ಪ್ರಯಾಣಿಕರಿಗೆ ಇನ್ನು ಹಸಿರ ಸಿರಿ ಮಧ್ಯೆ ವಿಶ್ರಾಂತಿಯ ಅನುಭವ

ಬೆಂಗಳೂರು : ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ (KIA) ಟರ್ಮಿನಲ್ 2 ತನ್ನ ವಾಸ್ತುಶಿಲ್ಪದ ವೈಭವಕ್ಕೆ ಈಗಾಗಲೇ ಜಗತ್ತಿನಾದ್ಯಂತ ಹೆಸರುವಾಸಿಯಾಗಿದ್ದು, ಈಗ ಅಲ್ಲಿ ಹೊಸದಾಗಿ ನಿರ್ಮಿಸಲಾದ ಸಾರ್ವಜನಿಕ ಗ್ಯಾಲರಿ ಮತ್ತು ಉದ್ಯಾನವು ಪ್ರಯಾಣಿಕರ ಮನಸೆಳೆಯುತ್ತಿದೆ. ‘ಉದ್ಯಾನ ನಗರಿ’ ಬೆಂಗಳೂರಿನ ಖ್ಯಾತಿಗೆ ತಕ್ಕಂತೆ ವಿನ್ಯಾಸಗೊಳಿಸಲಾದ ಈ ಗ್ಯಾಲರಿಯು ಸಂಪೂರ್ಣವಾಗಿ ಹಸಿರಿನಿಂದ ಕಂಗೊಳಿಸುತ್ತಿದ್ದು, ಪ್ರಯಾಣಿಕರು ವಿಮಾನ ನಿಲ್ದಾಣಕ್ಕೆ ನಿಗದಿತ ಸಮಯಕ್ಕಿಂತ ಮುಂಚಿತವಾಗಿ ಬಂದಾಗ ನೆಮ್ಮದಿಯಿಂದ ಕಾಲ ಕಳೆಯಲು ಮತ್ತು ವಿಶ್ರಾಂತಿ ಪಡೆಯಲು ಅತ್ಯುತ್ತಮ ತಾಣವಾಗಿದೆ. ಈ ಗ್ಯಾಲರಿಯ ಮೂಲಕವೇ ವಿಮಾನ ನಿಲ್ದಾಣದ ಒಳಭಾಗಕ್ಕೆ ಪ್ರವೇಶಿಸಲು ಅವಕಾಶ ಕಲ್ಪಿಸಲಾಗಿದ್ದು, ಸಸ್ಯಗಳು, ನೈಸರ್ಗಿಕ ವಿನ್ಯಾಸಗಳು ಮತ್ತು ಹಿತವಾದ ದೃಶ್ಯಗಳ ಸಮ್ಮಿಶ್ರಣವು ಪ್ರಯಾಣದ ಆಯಾಸವನ್ನು ಮರೆಸುವಂತೆ ಮಾಡುತ್ತದೆ. ಬಿದಿರಿನ ವಿನ್ಯಾಸಕ್ಕೆ ಹೆಸರಾಗಿರುವ ಟರ್ಮಿನಲ್ 2ರ ಹೊರಾಂಗಣ ಈಗ ಮತ್ತಷ್ಟು ಸುಂದರವಾಗಿದ್ದು, ಪರಿಸರ ಸ್ನೇಹಿ ಕಲಾಕೃತಿಗಳು ಮತ್ತು ಮೃದುವಾದ ಬೆಳಕಿನ ವ್ಯವಸ್ಥೆಯು ವಿಮಾನ ನಿಲ್ದಾಣದ ಸಾಮಾನ್ಯ ಗದ್ದಲವನ್ನು ಮರೆಸಿ ಶಾಂತಿಯುತ ವಾತಾವರಣವನ್ನು ಸೃಷ್ಟಿಸಿದೆ.

ವಿಶಾಲವಾದ ಕಾರಿಡಾರ್‌ಗಳು ಮತ್ತು ಆಕರ್ಷಕವಾದ ಗಾರ್ಡನ್ ಟ್ರಯಲ್ ಅಂತರಾಷ್ಟ್ರೀಯ ಗುಣಮಟ್ಟದ ಪ್ರವಾಸಿ ಅನುಭವವನ್ನು ನೀಡುತ್ತಿದ್ದು, ಈ ಸೌಲಭ್ಯದ ಕುರಿತಾದ ದೃಶ್ಯಗಳು ಎಕ್ಸ್ (X) ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿವೆ. ಈ ನೂತನ ಗ್ಯಾಲರಿಯು ಕೇವಲ ಸೌಂದರ್ಯಕ್ಕೆ ಮಾತ್ರ ಸೀಮಿತವಾಗದೆ, ಪ್ರಯಾಣಿಕರಿಗೆ ಹೆಚ್ಚಿನ ಕಾಲ ವಿಶ್ರಾಂತಿ ಪಡೆಯಲು ಸ್ಥಳಾವಕಾಶವನ್ನು ಕಲ್ಪಿಸುವ ಮೂಲಕ ವಿಮಾನ ನಿಲ್ದಾಣದ ಕಾರ್ಯಕ್ಷಮತೆಯನ್ನು ಹೆಚ್ಚಿಸಿದೆ. ಪ್ರಕೃತಿ ಆಧಾರಿತ ವಿನ್ಯಾಸದ ಈ ಹೊಸ ಸೇರ್ಪಡೆಯು ಟರ್ಮಿನಲ್ 2ರ ಸುಸ್ಥಿರ ಅಭಿವೃದ್ಧಿಯ ಗುರಿಗೆ ಮತ್ತೊಂದು ಗರಿ ನೀಡಿದಂತಾಗಿದ್ದು, ವಿಶ್ವದ ಅತ್ಯಂತ ಸುಂದರ ವಿಮಾನ ನಿಲ್ದಾಣಗಳ ಪಟ್ಟಿಯಲ್ಲಿ ಬೆಂಗಳೂರಿನ ಸ್ಥಾನವನ್ನು ಮತ್ತಷ್ಟು ಭದ್ರಪಡಿಸಿದೆ.