ಅಯೋಧ್ಯೆ ದೀಪೋತ್ಸವ: 26.11 ಲಕ್ಷ ದೀಪ ಬೆಳಗಿಸಿ ವಿಶ್ವ ದಾಖಲೆ ನಿರ್ಮಿಸಲು ಸಿದ್ಧತೆ

ನವದೆಹಲಿ: ದೀಪಾವಳಿಯ ಸ್ವಾಗತಕ್ಕೆ ಶ್ರೀರಾಮನ ಜನ್ಮಸ್ಥಾನ ಅಯೋಧ್ಯೆ ಸಕಲ ರೀತಿಯಿಂದ ಸಜ್ಜಾಗಿದೆ. ಈ ಬಾರಿ ಅಯೋಧ್ಯೆಯಲ್ಲಿ ದೀಪಾವಳಿ ಅಂಗವಾಗಿ ಬರೋಬ್ಬರಿ 26.11 ಲಕ್ಷ ಮಣ್ಣಿನ ದೀಪಗಳನ್ನು ಅಕ್ಟೋಬರ್ 19 ರಂದು ಬೆಳಗಿಸಲಾಗುತ್ತಿದ್ದು, ಇದು ಹೊಸ ಗಿನ್ನೆಸ್ ವಿಶ್ವ ದಾಖಲೆಯನ್ನು ಸ್ಥಾಪಿಸುವ ನಿರೀಕ್ಷೆ ಇದೆ. ಇದು ನಂಬಿಕೆ ಮತ್ತು ಸಮುದಾಯ ಮನೋಭಾವಕ್ಕೆ ಮಹತ್ವದ ಸಾಕ್ಷಿಯಾಗಿದೆ.

ಈ ವರ್ಷ ದೀಪಾವಳಿಗೆ ಅಯೋಧ್ಯೆಯಲ್ಲಿ ಭಾರೀ ಸಂಖ್ಯೆಯಲ್ಲಿ ಜನರು ಸೇರುವ ಸಾಧ್ಯತೆಗಳಿವೆ. ಡಾ. ರಾಮ್ ಮನೋಹರ್ ಲೋಹಿಯಾ ಅವಧ್ ವಿಶ್ವವಿದ್ಯಾಲಯದ ಸಮನ್ವಯದೊಂದಿಗೆ ವಿದ್ಯಾರ್ಥಿಗಳು, ಶಿಕ್ಷಕರು ಮತ್ತು ಸ್ಥಳೀಯ ಸಂಸ್ಥೆಗಳನ್ನು ಒಳಗೊಂಡ ಸುಮಾರು 33,000 ಸ್ವಯಂಸೇವಕರು 56 ಘಾಟ್‌ಗಳಾದ್ಯಂತ ದೀಪಗಳನ್ನು ಅಚ್ಚುಕಟ್ಟಾಗಿ ಜೋಡಿಸುತ್ತಿದ್ದಾರೆ. ಈ ಬೃಹತ್ ಕಾರ್ಯದ ಅರ್ಧದಷ್ಟನ್ನು, ಅಂದರೆ ಘಾಟ್ 8, 9, 10 ಮತ್ತು 11 ರಂತಹ ಪ್ರಮುಖ ಪ್ರದೇಶಗಳಲ್ಲಿ ಸುಮಾರು 7 ರಿಂದ 8 ಲಕ್ಷ ದೀಪಗಳನ್ನು ಈಗಾಗಲೇ ಇರಿಸಲಾಗಿದೆ.

“ಯುವ ಸ್ವಯಂಸೇವಕರಲ್ಲಿನ ಉತ್ಸಾಹವು ಎಲ್ಲರಿಗೂ ಸ್ಫೂರ್ತಿ ನೀಡುತ್ತದೆ. ಅವರ ಸಮರ್ಪಣೆ ‘ರಾಮ ಕಾಜ್’ ಜೊತೆ ಮುಂದಿನ ಪೀಳಿಗೆಗೆ ಇರುವ ಆಳವಾದ ಸಂಪರ್ಕವನ್ನು ತೋರಿಸುತ್ತದೆ,” ಎಂದು ನೋಡಲ್ ಅಧಿಕಾರಿ ಪ್ರೊ. ಸಂತ್ ಶರಣ್ ಮಿಶ್ರಾ ಹೇಳಿದ್ದಾರೆ.

ಸ್ಥಳೀಯ ಕುಶಲಕರ್ಮಿಗಳಿಗೆ ಬಂಬಲ

ಸಾಂಪ್ರದಾಯಿಕ ದೀಪಗಳಿಂದ ಜೀವನೋಪಾಯಕ್ಕೆ ಬೆಳಕು ದೀಪೋತ್ಸವ 2025 ಒಂದು ಭವ್ಯ ಪ್ರದರ್ಶನವಾಗಿರುವುದರ ಜೊತೆಗೆ ಸ್ಥಳೀಯ ಕುಶಲಕರ್ಮಿಗಳಿಗೆ ಪ್ರಮುಖ ಬೆಂಬಲದ ಮೂಲವಾಗಿದೆ. ಜೈಸಿಂಗ್‌ಪುರ, ಪುರಾ ಬಜಾರ್ ಮತ್ತು ಗೋಸೈಗಂಜ್‌ನಂತಹ ಅಯೋಧ್ಯೆ ಮತ್ತು ಸುತ್ತಮುತ್ತಲಿನ ಹಳ್ಳಿಗಳ ಸುಮಾರು 40 ಕುಂಬಾರ ಕುಟುಂಬಗಳು ಸುಮಾರು 16 ಲಕ್ಷ ದೀಪಗಳನ್ನು ಕೈಯಿಂದ ತಯಾರಿಸಿವೆ. ಉಳಿದ 10 ಲಕ್ಷ ದೀಪಗಳನ್ನು ಉತ್ತರ ಪ್ರದೇಶದ ವಿವಿಧ ಕೈಗಾರಿಕಾ ಘಟಕಗಳು, ಸಾಮಾಜಿಕ ಸಂಸ್ಥೆಗಳು ಮತ್ತು ಗ್ರಾಮೀಣ ಮಹಿಳೆಯರು ಪೂರೈಸಿದ್ದಾರೆ. ಈ ಕಾರ್ಯಕ್ರಮಕ್ಕೆ ಗಣನೀಯ ವ್ಯವಸ್ಥಾಪನಾ ನೆರವು ಬೇಕಾಗಿದ್ದು, ದೀಪಗಳನ್ನು ನಿರಂತರವಾಗಿ ಉರಿಸಲು ಆಯೋಜಕರು 55 ಲಕ್ಷ ಹತ್ತಿ ಬತ್ತಿಗಳು ಮತ್ತು 73,000 ಲೀಟರ್ ಎಣ್ಣೆಯನ್ನು ಬಳಸಲಿದ್ದಾರೆ.

ಪ್ರಮುಖ ದೀಪಾಲಂಕಾರ ಸ್ಥಳಗಳು:

ರಾಮ್ ಕಿ ಪೈಡಿ ಘಾಟ್‌ನಲ್ಲಿ 16 ಲಕ್ಷ ದೀಪಗಳನ್ನು ಬೆಳಗಲಾಗುತ್ತದೆ. ವಿಸ್ತೃತ ರಾಮ್ ಕಿ ಪೈಡಿಯಲ್ಲಿ 4.25 ಲಕ್ಷ ದೀಪಗಳು, ಚೌಧರಿ ಚರಣ್ ಸಿಂಗ್ ಘಾಟ್‌ನಲ್ಲಿ 4.75 ಲಕ್ಷ ದೀಪಗಳು, ಭಜನ್ ಸಂಧ್ಯಾ ಘಾಟ್‌ನಲ್ಲಿ 5.25 ಲಕ್ಷ ದೀಪಗಳು, ಲಕ್ಷ್ಮಣ್ ಕಿಲಾ ಘಾಟ್ ಮತ್ತು ಪಕ್ಕದ ಘಾಟ್‌ಗಳಲ್ಲಿ 1.25 ಲಕ್ಷ ದೀಪಗಳನ್ನು ಬೆಳಗಲು ಸಿದ್ದತೆಗಳನ್ನು ಮಾಡಿಕೊಳ್ಳಲಾಗಿದೆ.