ಆರ್ಥಿಕ ಹಿಂಜರಿತದಲ್ಲಿರುವ ಅಮೇರಿಕಾ;ಮೂಡಿಸ್ ತಜ್ಞನ ಎಚ್ಚರಿಕೆ ಕೇಳಿ ಟ್ರಂಪ್ ಗೆ ಶಾಕ್

ಸುಂಕ ಸಮರದಲ್ಲಿ ಡೊನಾಲ್ಡ್‌ ಟ್ರಂಪ್‌ ಏಕಾಂಗಿ ಆಗಿದ್ದು, ದೇಶದ ಆರ್ಥಿಕತೆ ಹಿಮ್ಮುಖವಾಗಿ ಚಲಿಸುತ್ತಿರುವುದನ್ನು ನೋಡುತ್ತಾ ನಿಂತಿದ್ದಾರೆ.

ಇದಕ್ಕೆ ಪುಷ್ಠಿ ಎಂಬಂತೆ, ಅಮೆರಿಕದಲ್ಲಿ ರಾಜ್ಯ ಮಟ್ಟದ ದತ್ತಾಂಶವು ದೇಶವು “ಆರ್ಥಿಕ ಹಿಂಜರಿತದ ಅಂಚಿನಲ್ಲಿದೆ” ಎಂಬುದನ್ನು
ತೋರಿಸುತ್ತದೆ ಎಂದು ಕ್ರೆಡಿಟ್ ರೇಟಿಂಗ್ ಏಜೆನ್ಸಿ ಮೂಡೀಸ್‌ನ ಮುಖ್ಯ ಅರ್ಥಶಾಸ್ತ್ರಜ್ಞ ಮಾರ್ಕ್ ಝಂಡಿ ಎಚ್ಚರಿಸಿದ್ದಾರೆ. ತನ್ನದೇ ಆದ ಕಾರಣಗಳಿಂದಾಗಿ ಆರ್ಥಿಕ ಹಿಂಜರಿತದ ಅಪಾಯದಲ್ಲಿ ಅಮೆರಿಕ ಸಿಲುಕಿಕೊಳ್ಳಲಿದೆ.

2008ರ ಆರ್ಥಿಕ ಬಿಕ್ಕಟ್ಟನ್ನು ಊಹಿಸಿದ ಮೊದಲ ಅರ್ಥಶಾಸ್ತ್ರಜ್ಞರಲ್ಲಿ ಒಬ್ಬರಾದ ಮಾರ್ಕ್‌ ಝಂಡಿ, “ಅಮೆರಿಕದ ಒಟ್ಟು ದೇಶೀಯ ಉತ್ಪನ್ನದ (ಜಿಡಿಪಿ) ಸುಮಾರು ಮೂರನೇ ಒಂದು ಭಾಗವನ್ನು ಹೊಂದಿರುವ ರಾಜ್ಯಗಳು ಪ್ರಸ್ತುತ ಆರ್ಥಿಕ ಹಿಂಜರಿತದಲ್ಲಿವೆ ಅಥವಾ ಅದನ್ನು ಪ್ರವೇಶಿಸುವ ಹಂತದಲ್ಲಿವೆ” ಎಂದು ಹೇಳಿರುವುದು ಇದೀಗ ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದಿದೆ.

ಝಂಡಿ ಹೇಳಿದ್ದು:

“ವಿವಿಧ ದತ್ತಾಂಶಗಳ ನನ್ನ ಮೌಲ್ಯಮಾಪನದ ಆಧಾರದ ಮೇಲೆ, ಅಮೆರಿಕ ಜಿಡಿಪಿಯ ಸುಮಾರು ಮೂರನೇ ಒಂದು ಭಾಗವನ್ನು ಹೊಂದಿರುವ ರಾಜ್ಯಗಳು, ಆರ್ಥಿಕ ಹಿಂಜರಿತದ ಅಪಾಯಕ್ಕೆ ಸಿಲುಕಲಿವೆ. ಅದೇ ರೀತಿ ಮತ್ತೊಂದು ಮೂರನೇ ಒಂದು ಭಾಗವು ಸ್ಥಿರವಾಗಿದೆ ಮತ್ತು ಉಳಿದ ಮೂರನೇ ಒಂದು ಭಾಗವು ಬೆಳೆಯುತ್ತಿದೆ” ಎಂದು ಮಾರ್ಕ್‌ ಝಂಡಿ ತಮ್ಮ ಎಕ್ಸ್‌ ಅಕೌಂಟ್‌ನಲ್ಲಿ ಪೋಸ್ಟ್‌ ಮಾಡಿದ್ದಾರೆ.

ಇದಲ್ಲದೆ, ನ್ಯೂಸ್‌ವೀಕ್‌ಗೆ ನೀಡಿದ ಸಂದರ್ಶನದಲ್ಲಿ, “ಸರಾಸರಿ ಅಮೆರಿಕನ್ನರಿಗೆ ಆರ್ಥಿಕ ಹಿಂಜರಿತದ ಅಪಾಯ ಎರಡು ರೀತಿಯಲ್ಲಿ ಕಂಡುಬರುತ್ತಿದೆ. ಅಂಗಡಿಯಲ್ಲಿ ಹೆಚ್ಚಿನ ಬೆಲೆಗಳು ಮತ್ತು ಆಹಾರ, ಸರಕುಗಳು ಮತ್ತು ಸಾರಿಗೆಗೆ ಸಂಬಂಧಿಸಿದ ಕೈಗಾರಿಕೆಗಳಲ್ಲಿ ಉದ್ಯೋಗಾವಕಾಶಗಳ ಅಡಚಣೆ” ಎಂದು ಮಾರ್ಕ್‌ ಝಂಡಿ ಹೇಳಿದ್ದಾರೆ. ಇವರು 2008ರ ಯುಎಸ್‌ ಆರ್ಥಿಕ ಹಿಂಜರಿತದ ಬಗ್ಗೆ ಮೊದಲೇ ಎಚ್ಚರಿಸಿದ್ದರು.

“ಅಮೆರಿಕದಲ್ಲಿ ಈಗಾಗಲೇ ಬೆಲೆಗಳು ಏರುತ್ತಿವೆ. ನೀವು ಅದನ್ನು ಡೇಟಾದಲ್ಲಿ ಸ್ಪಷ್ಟವಾಗಿ ನೋಡಬಹುದು. ಆದರೆ ಮುಂದಿನ ದಿನಗಳಲ್ಲಿ ಜನರು ನಿರ್ಲಕ್ಷಿಸಲು ಅಸಾಧ್ಯವಾದ ಮಟ್ಟಕ್ಕೆ ಅವು ಏರಲಿವೆ. ಅವರು ಪ್ರತಿದಿನ ಖರೀದಿಸುವ ವಸ್ತುಗಳಲ್ಲಿ ಅದನ್ನು ಸ್ಪಷ್ಟವಾಗಿ ನೋಡುತ್ತಾರೆ” ಎಂದು ಮುಖ್ಯ ಅರ್ಥಶಾಸ್ತ್ರಜ್ಞ ಅಮೆರಿಕರನ್ನರನ್ನು ಎಚ್ಚರಿಸಿದ್ದಾರೆ.
ಹೆಚ್ಚಲಿದೆ ಹಣದುಬ್ಬರ:

“ಪ್ರಸ್ತುತ ಶೇ. 2.7ರಷ್ಟಿರುವ ಅಮೆರಿಕದ ವಾರ್ಷಿಕ ಹಣದುಬ್ಬರ ದರವು, ಮುಂದಿನ ವರ್ಷದ ಈ ವೇಳೆಗೆ ಶೇ. 3ಕ್ಕಿಂತ ಹೆಚ್ಚಾಗಿರುತ್ತದೆ ಮತ್ತು ಶೇ. 4ರ ಸಮೀಪಕ್ಕೆ ಏರುತ್ತದೆ” ಎಂದು ಝಂಡಿ ಭವಿಷ್ಯ ನುಡಿದಿದ್ದಾರೆ. ಅಲ್ಲದೇ “ಆರ್ಥಿಕ ಹಿಂಜರಿತವನ್ನು ಅನುಭವಿಸುತ್ತಿರುವ ರಾಜ್ಯಗಳು ದೇಶಾದ್ಯಂತ ಹರಡಿಕೊಂಡಿದ್ದು, ಹಣದುಬ್ಬರದ ಭೀಕರ ಪರಿಣಾಮಗಳನ್ನು ಎದುರಿಸಲಿವೆ” ಎಂದು ಅವರು ಅಂದಾಜಿಸಿದ್ದಾರೆ.

ಮಾರ್ಕ್‌ ಝಂಡಿ ಅವರ ವಿಶ್ಲೇಷಣೆಯು ಅಮೆರಿಕದ ದಕ್ಷಿಣ ರಾಜ್ಯಗಳು ಸಾಮಾನ್ಯವಾಗಿ ಪ್ರಬಲವಾಗಿವೆ ಎಂದು ತೋರಿಸಿದೆ. ಆದರೆ ಅವುಗಳ ಬೆಳವಣಿಗೆ ನಿಧಾನವಾಗುತ್ತಿರುವುದು ಸ್ಪಷ್ಟವಾಗಿದೆ. ಯು.ಎಸ್. ಜಿಡಿಪಿಯ ಐದನೇ ಒಂದು ಭಾಗಕ್ಕಿಂತ ಹೆಚ್ಚಿನದನ್ನು ಹೊಂದಿರುವ ಕ್ಯಾಲಿಫೋರ್ನಿಯಾ ಮತ್ತು ನ್ಯೂಯಾರ್ಕ್, ತಮ್ಮದೇ ಆದ ಹಿಡಿತವನ್ನು ಹೊಂದಿದ್ದು, ರಾಷ್ಟ್ರೀಯ ಆರ್ಥಿಕತೆಯ ಕುಸಿತವನ್ನು ತಪ್ಪಿಸಲು ಅವುಗಳ ಸ್ಥಿರತೆಯು ನಿರ್ಣಾಯಕವಾಗಿದೆ.

ವ್ಯೋಮಿಂಗ್, ಮೊಂಟಾನಾ, ಮಿನ್ನೇಸೋಟ, ಮಿಸ್ಸಿಸ್ಸಿಪ್ಪಿ, ಕಾನ್ಸಾಸ್ ಮತ್ತು ಮ್ಯಾಸಚೂಸೆಟ್ಸ್ ಆರ್ಥಿಕ ಹಿಂಜರಿತದ ಅಪಾಯದಲ್ಲಿರುವ ಕೆಲವು ರಾಜ್ಯಗಳಾಗಿವೆ ಎಂಬುದನ್ನು ಮಾರ್ಕ್‌ ಝೆಂಡಿ ವಿಶ್ಲೇಷಣೆ ತಿಳಿಸುತ್ತದೆ.

2025ರಲ್ಲಿ ಜುಲೈವರೆಗೆ ಯುಎಸ್ ಗ್ರಾಹಕರ ಖರ್ಚು, ಕಳೆದ ವರ್ಷಕ್ಕೆ ಹೋಲಿಸಿದರೆ ಕಡಿಮೆಯಾಗಿದೆ. ಇದು ಅರ್ಥವ್ಯವಸ್ಥೆ ಆರ್ಥಿಕ ಹಿಂಜರಿತದ ಅಂಚಿನಲ್ಲಿದೆ ಎಂದು ಸೂಚಿಸುತ್ತದೆ ಎಂದು ಮಾರ್ಕ್‌ ಝೆಂಡಿ ಹೇಳಿದ್ದಾರೆ. ಅಮೆರಿಕದ ಆರ್ಥಿಕ ಹಿಂಜರಿತ ಭಾರತದ ಮೇಲೂ ಪರಿಣಾಮ ಬೀರುತ್ತದೆ ಎಂದು ಹಲವು ಅರ್ಥಶಾಸ್ತ್ರಜ್ಞರು ಹೇಳುತ್ತಾರೆ.