ಅಹಮದಾಬಾದ್ ವಿಮಾನ ದುರಂತ: ಮೃತರ ಕುಟುಂಬಕ್ಕೆ LIC ಕ್ಲೈಮ್ ಇತ್ಯರ್ಥದಲ್ಲಿ ವಿನಾಯಿತಿ ಘೋಷಣೆ

ಅಹಮದಾಬಾದ್‌ : ಅಹಮದಾಬಾದ್‌’ನಲ್ಲಿ ನಡೆದ ಏರ್ ಇಂಡಿಯಾ AI 171 ವಿಮಾನ ಅಪಘಾತದಲ್ಲಿ ಮೃತಪಟ್ಟ ಕುಟುಂಬಸ್ಥರಿಗೆ ಬಿಎಸ್‌ಇ ಮತ್ತು ಎನ್‌ಎಸ್‌ಇ-ಪಟ್ಟಿಯಲ್ಲಿರುವ ಭಾರತೀಯ ಜೀವ ವಿಮಾ ನಿಗಮ (LIC) ಶುಕ್ರವಾರ ವಿನಾಯಿತಿಗಳನ್ನ ಪ್ರಕಟಿಸಿದೆ.

ಅಹಮದಾಬಾದ್‌’ನಲ್ಲಿ ನಡೆದ ವಿಮಾನ ಅಪಘಾತದಲ್ಲಿ ಸಾವನ್ನಪ್ಪಿದ ಏರ್ ಇಂಡಿಯಾ ವಿಮಾನದ ಪ್ರಯಾಣಿಕರು ಮತ್ತು ಸಿಬ್ಬಂದಿ ಮತ್ತು ನೆಲದ ಮೇಲಿದ್ದ ಜನರ ಸಾವಿನ ಬಗ್ಗೆ ತೀವ್ರ ದುಃಖ ವ್ಯಕ್ತಪಡಿಸಿದ ಎಲ್‌ಐಸಿ, ಸಂತ್ರಸ್ತರಿಗೆ ಬೆಂಬಲ ನೀಡಲು ಬದ್ಧವಾಗಿದೆ ಮತ್ತು ಆರ್ಥಿಕ ಪರಿಹಾರವನ್ನು ಒದಗಿಸಲು ಕ್ಲೈಮ್ ಇತ್ಯರ್ಥಗಳನ್ನು ತ್ವರಿತಗೊಳಿಸುವುದಾಗಿ ಹೇಳಿದೆ.

ದುರ್ಬಲ ಮಾರುಕಟ್ಟೆಯಲ್ಲಿ ಎಲ್‌ಐಸಿ ಷೇರುಗಳು ಬಿಎಸ್‌ಇಯಲ್ಲಿ ಶೇ. 0.56 ರಷ್ಟು ಕುಸಿದು 938 ರೂ.ಗಳಲ್ಲಿ ವಹಿವಾಟು ನಡೆಸುತ್ತಿದ್ದವು. ಬಿಎಸ್‌ಇ ಸೆನ್ಸೆಕ್ಸ್ 613.79 ಅಂಕಗಳು ಅಥವಾ ಶೇ. 0.75 ರಷ್ಟು ಕುಸಿತದೊಂದಿಗೆ 81,078.19 ಕ್ಕೆ ತಲುಪಿತ್ತು.

ಜೂನ್ 12, 2025 ರಂದು ಅಹಮದಾಬಾದ್‌ನಿಂದ ಲಂಡನ್ ಗ್ಯಾಟ್ವಿಕ್‌’ಗೆ ಹಾರುತ್ತಿದ್ದ ತನ್ನ ಎಐ-171 ವಿಮಾನವು ಟೇಕ್ ಆಫ್ ಆದ ಸ್ವಲ್ಪ ಸಮಯದ ನಂತರ ಅಪಘಾತಕ್ಕೀಡಾಯಿತು ಎಂದು ಏರ್ ಇಂಡಿಯಾ ವರದಿ ಮಾಡಿದೆ. ಬೋಯಿಂಗ್ 787-8 ವಿಮಾನ ಅಪಘಾತದಲ್ಲಿ ವಿಮಾನದಲ್ಲಿದ್ದ 241 ಪ್ರಯಾಣಿಕರು ಸೇರಿದಂತೆ ಕನಿಷ್ಠ 265 ಜನರು ಸಾವನ್ನಪ್ಪಿದರು. ವಿಮಾನದಲ್ಲಿದ್ದವರಲ್ಲಿ 169 ಭಾರತೀಯ ಪ್ರಜೆಗಳು, 53 ಬ್ರಿಟಿಷ್ ಪ್ರಜೆಗಳು, ಏಳು ಪೋರ್ಚುಗೀಸ್ ಮತ್ತು ಒಬ್ಬ ಕೆನಡಾ ಇದ್ದರು.