ವಿಮಾನ ಲ್ಯಾಂಡಿಂಗ್ ಸಮಯದಲ್ಲಿ ಸಂಭವಿಸಿದ ಅವಘಡ; ಬೆಂಕಿ ಹತ್ತಿದ್ದ ವಿಮಾನದಿಂದ ಅಪಾಯದಿಂದ ಪಾರಾದ ಸಚಿವರು ಹಾಗೂ ಅಧಿಕಾರಿಗಳು

ಕಾಂಗೋ: ಗಣಿಗಾರಿಕೆ ಸಚಿವಾಲಯದ ನಿಯೋಗವನ್ನು ಹೊತ್ತ ವಿಮಾನವೊಂದು ಅಪಘಾತಕ್ಕೀಡಾಗಿದೆ. ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋದ (Democratic Republic of the Congo) ಕೋಲ್ವೆಜಿ ವಿಮಾನ ನಿಲ್ದಾಣದಲ್ಲಿ (Kolwezi Airport) ಈ ಅವಘಡ ಸಂಭವಿಸಿದೆ.

ಸಾಮಾನ್ಯವಾಗಿ ವಿಮಾನ ಅಪಘಾತದಲ್ಲಿ ಬದುಕುಳಿಯುವುದು ಕಷ್ಟ. ಆದ್ರೆ ಇಲ್ಲಿದ್ದ ಓರ್ವ ಗಣಿಗಾರಿಕೆ ಸಚಿವ ಹಾಗೂ ಅಧಿಕಾರಿಗಳು ಬದುಕುಳಿದಿದ್ದೇ ಅಚ್ಚರಿ. ಜೀವವನ್ನ ಉಳಿಸಿಕೊಳ್ಳೋಕೆ ಬೆಂಕಿ ಹತ್ತಿದ್ದ ವಿಮಾನದಿಂದ ಎದ್ನೋ ಬಿದ್ನೋ ಅಂತಾ ಆಚೆ ಬಂದಿದ್ದಾರೆ. ವಿಮಾನ ಲ್ಯಾಂಡಿಂಗ್ ಸಮಯದಲ್ಲಿ ಈ ದುರ್ಘಟನೆ ಸಂಭವಿಸಿದೆ. ಕೂಡಲೇ ಎಚ್ಚೆತ್ತ ವಿಮಾನ ನಿಲ್ದಾಣದ ಸಿಬ್ಬಂದಿ ಕಾರ್ಯಾಚರಣೆ ಮಾಡಿದ್ದಾರೆ.

ವಿಮಾನದಲ್ಲಿದ್ದ ಎಲ್ಲಾ ಸಿಬ್ಬಂದಿ ಮತ್ತು ಪ್ರಯಾಣಿಕರು ಸುರಕ್ಷಿತವಾಗಿ ಹೊರಬರಲು ಸಾಧ್ಯವಾಗಿದೆ. ಗಣಿಗಾರಿಕೆ ಸಚಿವಾಲಯದ ನಿಯೋಗವು ಈ ಪ್ರದೇಶದ ಪ್ರಮುಖ ಗಣಿಗಾರಿಕೆ ಕಾರ್ಯಾಚರಣೆಗಳಿಗೆ ಸಂಬಂಧಿಸಿದ ಅಧಿಕೃತ ವ್ಯವಹಾರಕ್ಕಾಗಿ ಕೋಲ್ವೆಜಿಗೆ ಪ್ರಯಾಣಿಸುತ್ತಿತ್ತು ಎಂದು ವರದಿಯಾಗಿದೆ.