ಚೀನಾದಲ್ಲಿ ಇನ್ನು ಬರಲಿದೆ ಪೈಲೆಟ್‌ರಹಿತ ಹಾರುವ ಟ್ಯಾಕ್ಸಿ

ಬೀಜಿಂಗ್:‌ ಚೀನಾ ತನ್ನ ಮೊಟ್ಟಮೊದಲ ಸ್ವಯಂಚಾಲಿತ ಪ್ರಯಾಣಿಕ ಡ್ರೋನ್‌ಗಳಿಗೆ ಅನುಮೋದನೆ ನೀಡಿದೆ. ಇವುಗಳನ್ನು “ಹಾರುವ ಟ್ಯಾಕ್ಸಿ” ಎಂದು ಕರೆಯಲಾಗಿದ್ದು, ಪೈಲೆಟ್‌ರಹಿತ ಹಾರುವ ಟ್ಯಾಕ್ಸಿಗಳ ವಾಣಿಜ್ಯ ಬಳಕೆಗೆ ಅನುಮೋದನೆ ನೀಡಲಾಗಿದೆ.‌ “ಚೀನಾ ನಾಗರಿಕ ವಿಮಾನಯಾನ ಆಡಳಿತ (CAAC) ಈ ಮೊದಲ ಸ್ವಯಂಚಾಲಿತ ಹಾರುವ ಟ್ಯಾಕ್ಸಿಗಳಿಗೆ ಅನುಮತಿ ನೀಡಿದೆ..” ಎಂದು ಸೌತ್ ಚೀನಾ ಮಾರ್ನಿಂಗ್ ಪೋಸ್ಟ್ ವರದಿ ಮಾಡಿದೆ.

ಸಿಎಎಸಿಯ ಈ ಅನುಮತಿಯಿಂದ ಚೀನಾದ “ಇಹಾಂಗ್‌ ಹೋಲ್ಡಿಂಗ್ಸ್‌” ಮತ್ತು “ಹೆಫಿ ಹೇ ಏರ್‌ಲೈನ್ಸ್” ಕಂಪನಿಗಳು, ಚೀನಾದ ಪ್ರಮುಖ ನಗರಗಳ ಪ್ರವಾಸಿ ತಾಣಗಳಿಗೆ ಪ್ರಯಾಣಿಕರನ್ನು ಕೊಂಡೊಯ್ಯಲು ಸ್ವಯಂಚಾಲಿತ ಹಾರುವ ಟ್ಯಾಕ್ಸಿಗಳನ್ನು ಬಳಸಬಹುದಾಗಿದೆ.

ಎರಡು ಚೀನೀ ಕಂಪನಿಗಳು ಸಿಎಎಸಿಯಿಂದ ಸ್ವಯಂಚಾಲಿತ ಪ್ರಯಾಣಿಕ ಡ್ರೋನ್‌ಗಳ ವಾಣಿಜ್ಯ ಕಾರ್ಯಾಚರಣೆಗೆ ಪ್ರಮಾಣಪತ್ರ ಪಡೆದಿವೆ. ಸಿಟಿಕ್ ಸೆಕ್ಯುರಿಟೀಸ್ ವರದಿಯ ಪ್ರಕಾರ, ಈ ಕಂಪನಿಗಳು ತಮ್ಮ ವಿನ್ಯಾಸ, ಉತ್ಪಾದನೆ ಮತ್ತು ಸುರಕ್ಷತಾ ಪ್ರಮಾಣಪತ್ರಗಳನ್ನು ಅಧಿಕೃತವಾಗಿ ಪಡೆದುಕೊಂಡಿವೆ. ಇದು ಕೊನೆಯ ಹಂತದ ಅನುಮೋದನೆಯಾಗಿದ್ದು, ಪ್ರವಾಸೋದ್ಯಮದ ಬೆಳವಣಿಗೆಯನ್ನು ಮತ್ತಷ್ಟು ಚುರುಕುಗೊಳಿಸುವ ವಿಶ್ವಾಸವಿದೆ.
ಕೇವಲ ಪ್ರಯಾಣಿಕ ಹಾರುವ ಟ್ಯಾಕ್ಸಿ ಮಾತ್ರವಲ್ಲದೇ ಡೆಲಿವರಿ ಡ್ರೋನ್‌ಗಳು, ಬ್ಲಿಂಪ್‌ಗಳು ಮತ್ತು ಹಾರುವ ಕಾರುಗಳಂತಹ ಹೊಸ ಆವಿಷ್ಕಾರಗಳಿಗೂ ಚೀನಾದಲ್ಲಿ ಭಾರೀ ಬೆಂಬಲ ದೊರೆಯುತ್ತಿದೆ. ಚೀನೀ ಸರ್ಕಾರವು ಈ ಕ್ಷೇತ್ರವನ್ನು ಆರ್ಥಿಕ ಬೆಳವಣಿಗೆಗೆ ಮುಖ್ಯವೆಂದು ಪರಿಗಣಿಸುತ್ತದೆ. ಜೊತೆಗೆ ಬಯೋ ಉತ್ಪಾದನೆ, ಕ್ವಾಂಟಮ್ ಕಂಪ್ಯೂಟಿಂಗ್, AI (ಕೃತಕ ಬುದ್ಧಿಮತ್ತೆ) ಮತ್ತು 6G ನೆಟ್‌ವರ್ಕ್‌ಗಳಂತಹ ತಂತ್ರಜ್ಞಾನಗಳಿಗೂ ಬೆಂಬಲ ನೀಡುತ್ತಿದೆ.

ಇಹಾಂಗ್‌ EH216-S ಚೀನಾದ ಮೊದಲ ಹಾರುವ ಟ್ಯಾಕ್ಸಿ ಎಂಬ ಹೆಗ್ಗಳಿಕೆಯನ್ನು ಪಡೆದುಕೊಂಡಿದೆ. ಇದು ಸಂಪೂರ್ಣವಾಗಿ ಎಲೆಕ್ಟ್ರಿಕ್ ವಾಹನವಾಗಿದ್ದು. ಪೈಲೆಟರ್‌ರಹಿತ ಎರಡು ಆಸನಗಳ ವಾಹನವಾಗಿದೆ. ಇದು 16 ಪ್ರೊಪೆಲ್ಲರ್‌ಗಳು ಮತ್ತು ಕಾರ್ಬನ್ ಫೈಬರ್‌ನಿಂದ ಮಾಡಲ್ಪಟ್ಟಿದೆ. ಇದು ಗಂಟೆಗೆ 100 ಕಿಮೀ ವೇಗದಲ್ಲಿ ಚಲಿಸುತ್ತದೆ ಮತ್ತು ಗರಿಷ್ಠ 10,000 ಅಡಿ (3,000 ಮೀಟರ್) ಎತ್ತರಕ್ಕೆ ತಲುಪುವ ಸಾಮರ್ಥ್ಯವನ್ನು ಹೊಂದಿದೆ.

EH216-S ಸ್ವಯಂಚಾಲಿತವಾಗಿ ಕಾರ್ಯನಿರ್ವಹಿಸುತ್ತದೆ. ಇದಕ್ಕೆ ಪೈಲಟ್ ಅಗತ್ಯವಿಲ್ಲ. ಇಹಾಂಗ್‌ ಕಂಪನಿಯು ಇದನ್ನು ಏರ್ ಟ್ಯಾಕ್ಸಿ ಸೇವೆಗಳು, ವೈಮಾನಿಕ ಪ್ರವಾಸೋದ್ಯಮ, ವಿಮಾನ ನಿಲ್ದಾಣದ ಸಾಗಣೆ ಮತ್ತು ದ್ವೀಪಗಳ ನಡುವಿನ ಸಾರಿಗೆಗಾಗಿ ಬಳಸಲು ಯೋಜಿಸಿದೆ. ಹುರುನ್ ರಿಸರ್ಚ್‌ ಗ್ರೂಪ್‌ ಪ್ರಕಾರ, “ಚೀನಾದ ಫ್ಲೈಯಿಂಗ್‌ ಟೂರಿಸಂ 2025ರ ಅಂತ್ಯದ ವೇಳೆಗೆ 1.5 ಟ್ರಿಲಿಯನ್ ಯುವಾನ್ ಮೌಲ್ಯವನ್ನು ಹೊಂದಿರಬಹುದು. ಅದೇ ರೀತಿ 2035ರ ವೇಳೆಗೆ ಇದು 2.5 ಟ್ರಿಲಿಯನ್ ಯುವಾನ್‌ಗೆ ವಿಸ್ತರಿಸಬಹುದು..” ಎಂದು ಅಂದಾಜಿಸಲಾಗಿದೆ.

ಚೀನಾ ಈ ರೀತಿಯ ಆರ್ಥಿಕತೆಗೆ ಉತ್ತೇಜನ ನೀಡುತ್ತಿದ್ದು, ಹೊಸ ಉದ್ಯೋಗಾವಕಾಶಗಳ ಸೃಷ್ಠಿ ಆರ್ಥಿಕ ಬೆಳವಣಿಗೆಗೆ ಪೂರಕವಾದ ನಿರ್ಣಯಗಳನ್ನು ಕೈಗೊಳ್ಳುತ್ತಿದೆ. ಸದ್ಯ ಕೇವಲ ಎರಡು ಕಂಪನಿಗಳಿಗೆ ಮಾತ್ರ ಹಾರುವ ಟ್ಯಾಕ್ಸಿಗಳನ್ನು ಬಳಸುವ ಅನುಮತಿ ನೀಡಲಾಗಿದ್ದು, ಮುಂದಿನ ದಿನಗಳಲ್ಲಿ ಈ ಸೇವೆಗಳು ಸಾಮಾನ್ಯವಾಗುವ ಸಾಧ್ಯತೆಯಿದೆ ಎಂದು ಮೂಲಗಳು ಖಚಿತಪಡಿಸಿವೆ.