ಮೆಟ್ ಗಾಲಾ 2026: 180 ಕ್ಯಾರೆಟ್ ವಜ್ರದ ಹಾರ ಧರಿಸಿ ಜಗತ್ತಿನ ಗಮನ ಸೆಳೆದ ಹೈದರಾಬಾದ್ ಉದ್ಯಮಿ ಸುಧಾ ರೆಡ್ಡಿ

ನ್ಯೂಯಾರ್ಕ್: ಫ್ಯಾಷನ್ ಲೋಕದ ಅತ್ಯಂತ ಪ್ರತಿಷ್ಠಿತ ವೇದಿಕೆ ‘ಮೆಟ್ ಗಾಲಾ’ (Met Gala 2026) ಈ ಬಾರಿಯೂ ಜಗತ್ತಿನ ಗಮನ ಸೆಳೆದಿದೆ. ಹಾಲಿವುಡ್ ತಾರೆಯರ ನಡುವೆ ಹೈದರಾಬಾದ್ ಮೂಲದ ಉದ್ಯಮಿ ಮತ್ತು ಸುಧಾ ರೆಡ್ಡಿ (Sudha Reddy) ಅವರು ತಮ್ಮ ರಾಜಮನೆತನದ ಲುಕ್ ಮೂಲಕ ಎಲ್ಲರ ಕಣ್ಣು ಕುಕ್ಕುವಂತೆ ಮಾಡಿದ್ದಾರೆ.

180 ಕ್ಯಾರೆಟ್ ವಜ್ರದ ವೈಭವ!

ಈ ಬಾರಿಯ ಮೆಟ್ ಗಾಲಾದಲ್ಲಿ ಸುಧಾ ರೆಡ್ಡಿ ಅವರು ಧರಿಸಿದ್ದ ಆಭರಣವೇ ಎಲ್ಲರ ಆಕರ್ಷಣೆಯ ಕೇಂದ್ರಬಿಂದುವಾಗಿತ್ತು. ಬರೋಬ್ಬರಿ 180 ಕ್ಯಾರೆಟ್ ವಜ್ರಗಳಿಂದ ಕೂಡಿದ ‘ಅಮೋರೆ ಎಟರ್ನೊ’ (Amore Eterno) ಎಂಬ ನೆಕ್ಲೇಸ್ ಧರಿಸಿ ಅವರು ರೆಡ್ ಕಾರ್ಪೆಟ್ ಮೇಲೆ ಹೆಜ್ಜೆ ಹಾಕಿದರು. ಈ ಹಾರದಲ್ಲಿರುವ 25 ಕ್ಯಾರೆಟ್‌ನ ಹೃದಯಾಕಾರದ ವಜ್ರಗಳು ನೋಡುಗರನ್ನು ಮಂತ್ರಮುಗ್ಧಗೊಳಿಸಿದವು.
ಫ್ಯಾಷನ್ ಡಿಸೈನರ್ ತರುಣ್ ತಹಿಲಿಯಾನಿ ವಿನ್ಯಾಸಗೊಳಿಸಿದ ವಿಶೇಷ ಗೌನ್‌ನಲ್ಲಿ ಸುಧಾ ರೆಡ್ಡಿ ಅದ್ಭುತವಾಗಿ ಕಾಣುತ್ತಿದ್ದರು. ಈ ಗೌನ್ ವಿನ್ಯಾಸಗೊಳಿಸಲು ನೂರಾರು ಗಂಟೆಗಳ ಕಾಲ ಕೆಲಸ ಮಾಡಲಾಗಿದೆ ಎಂದು ತಿಳಿದುಬಂದಿದೆ. ‘ಗಾರ್ಡನ್ ಆಫ್ ಟೈಮ್’ ಎಂಬ ಥೀಮ್‌ಗೆ ತಕ್ಕಂತೆ ಸುಧಾ ರೆಡ್ಡಿ ಅವರ ಉಡುಗೆ ಮತ್ತು ಆಭರಣಗಳ ಆಯ್ಕೆ ಇತ್ತು.

ಯಾರು ಈ ಸುಧಾ ರೆಡ್ಡಿ?

ಹೈದರಾಬಾದ್ ಮೂಲದ ಮೇಘಾ ಇಂಜಿನಿಯರಿಂಗ್ ಅಂಡ್ ಇನ್ಫ್ರಾಸ್ಟ್ರಕ್ಚರ್ ಲಿಮಿಟೆಡ್ (MEIL) ಸಂಸ್ಥೆಯ ಕೃಷ್ಣ ರೆಡ್ಡಿ ಅವರ ಪತ್ನಿಯಾಗಿರುವ ಸುಧಾ ರೆಡ್ಡಿ, ಕೇವಲ ಉದ್ಯಮಿ ಮಾತ್ರವಲ್ಲದೆ ಒಬ್ಬ ದಾನಿಯೂ ಹೌದು. ಅವರು ತಮ್ಮದೇ ಆದ ‘ಸುಧಾ ರೆಡ್ಡಿ ಫೌಂಡೇಶನ್’ ಮೂಲಕ ಹಲವು ಸಾಮಾಜಿಕ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಮೆಟ್ ಗಾಲಾ ವೇದಿಕೆಯಲ್ಲಿ ಸತತವಾಗಿ ಕಾಣಿಸಿಕೊಳ್ಳುತ್ತಿರುವ ಕೆಲವೇ ಕೆಲವು ಭಾರತೀಯರಲ್ಲಿ ಇವರೂ ಒಬ್ಬರು. ಆಲಿಯಾ ಭಟ್ ಅವರ ಸೀರೆ ವಿನ್ಯಾಸದ ಜೊತೆಗೆ ಸುಧಾ ರೆಡ್ಡಿ ಅವರ ಈ ವಜ್ರದ ವೈಭವ ಕೂಡ ಅಂತರಾಷ್ಟ್ರೀಯ ಮಾಧ್ಯಮಗಳಲ್ಲಿ ಸುದ್ದಿಯಾಗಿದೆ. ಭಾರತೀಯ ಸಂಸ್ಕೃತಿ ಮತ್ತು ಆಧುನಿಕ ಫ್ಯಾಷನ್ ಎರಡನ್ನೂ ಸಮತೋಲನಗೊಳಿಸಿದ ಅವರ ಶೈಲಿಗೆ ನೆಟ್ಟಿಗರು ಫಿದಾ ಆಗಿದ್ದಾರೆ.