ಬಿಎಂಟಿಸಿ ಬಸ್‌ನಲ್ಲಿ ಮಹಿಳೆಯ ದರ್ಪ: ಉಚಿತ ಟಿಕೆಟ್ ಹರಿದು ಕಂಡಕ್ಟರ್‌ಗೆ ಕಿರಿಕ್!

ಬೆಂಗಳೂರು: ಬಿಎಂಟಿಸಿ ಬಸ್‌ನಲ್ಲಿ ಶಕ್ತಿ ಯೋಜನೆ ಉಚಿತ ಟಿಕೆಟ್‌ ಹರಿದು ಹಾಕಿ, ಬಳಿಕ ಹಣ ಕೊಟ್ಟು ಟಿಕೆಟ್‌ ಪಡೆಯದೇ ಮಹಿಳೆಯೊಬ್ಬರು ದರ್ಪ ತೋರಿದ್ದಾರೆ. ಇತ್ತ ಚೆಕ್ಕಿಂಗ್ ಆಫೀಸ್‌ ಬಂದರೆ ನನ್ನ ಕೆಲಸ ಹೋಗುತ್ತೆಂದು ರಸ್ತೆಲೇ ಕಂಡಕ್ಟರ್ ಬಸ್‌ ನಿಲ್ಲಿಸಿದ್ದಾರೆ

ಇದರಿಂದ ಪ್ರಯಾಣಿಕರು ಕೆಲ ಕಾಲ ಪರದಾಡಿದ್ದಾರೆ.

ಬೆಂಗಳೂರಿನಲ್ಲಿ ಇತ್ತೀಚೆಗೆ ಈ ಘಟನೆ ನಡೆದಿದೆ. ಉಚಿತ ಟಿಕೆಟ್‌ ವಿಚಾರದಲ್ಲಿ ಮಹಿಳೆ ದರ್ಪ ತೋರಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಇದು ಶಕ್ತಿ ಯೋಜನೆಯ ದುರುಪಯೋಗ ಅಲ್ಲವೇ? ಬಿಎಂಟಿಸಿ ಒಂದು ಸಾರ್ವಜನಿಕ ಆಸ್ತಿ, ಇಲ್ಲಿ ಅಸಂಬದ್ಧ ವರ್ತನೆಯು ಇತರೆ ಪ್ರಯಾಣಿಕರಿಗೆ ಸಮಸ್ಯೆಯಾಗುತ್ತದೆ ಎಂದು ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ವೈರಲ್ ವಿಡಿಯೋದಲ್ಲಿ ಏನಿದೆ?

ಮಹಿಳೆಯೊಬ್ಬರು ಸೀಟ್‌ನಲ್ಲಿ ಕುಳಿತಿದ್ದು ಅವರನ್ನು ಹಣ ಕೊಟ್ಟು ಟಿಕೆಟ್‌ ಪಡೆಯಿರಿ ಚೆಕ್ಕಿಂಗ್ ಆಫೀಸರ್ ಬಂದರೆ ನಮಗೆ ಸಮಸ್ಯೆಯಾಗುತ್ತದೆ ಎಂದು ಕಂಡಕ್ಟರ್ ಮನವಿ ಮಾಡುತ್ತಿದ್ದಾರೆ. ಆದರೆ, ಮಹಿಳೆ ಚೆಕ್ಕಿಂಗ್ ಬಂದರೆ ನಾನು ಅವರಿಗೆ ಹೇಳುತ್ತೇನೆ ಎಂದು ದರ್ಪದಿಂದ ಮಾತನಾಡಿ ಹಣ ಕೊಟ್ಟು ಟಿಕೆಟ್‌ ಪಡೆಯಲು ನಿರಾಕರಿಸಿದ್ದಾರೆ. ಇದರಿಂದ ಬೇಸತ್ತ ಇತರೆ ಪ್ರಯಾಣಿಕರು ಮಹಿಳೆ ವಿರುದ್ಧ ಕಿಡಿಕಾರಿದ್ದಾರೆ. ಜತೆಗೆ ಮಹಿಳೆಯನ್ನು ಕೆಳಗಿಳಿಸಿ ಬಸ್‌ ಸಂಚಾರ ಆರಂಭಿಸುವಂತೆ ಕಂಡಕ್ಟರ್‌ಗೆ ಒತ್ತಾಯಿಸಿದ್ದಾರೆ. ಇತ್ತ ಕಂಡಕ್ಟರ್ ನೀವೆ ಆ ಮಹಿಳೆಗೆ ಹೇಳಿ ಎಂದು ಪ್ರಯಾಣಿಕರನ್ನು ಕೇಳಿಕೊಂಡಿದ್ದಾರೆ.

ಸಾರ್ವಜನಿಕ ಸಾರಿಗೆಯಲ್ಲಿ ಇಂತಹ ವರ್ತನೆ ಸರಿಯಲ್ಲ

ವಿಡಿಯೋ ಹಂಚಿಕೊಂಡಿರುವ ಕರ್ನಾಟಕ ಪೋರ್ಟ್‌ಪೋಲಿಯೋ ಟ್ವೀಟರ್ ಪೇಜ್‌, “ಈ ರೀತಿಯ ದುರಹಂಕಾರದ ಬಗ್ಗೆ ಏನು ಹೇಳಬಹುದು? ಸಾರ್ವಜನಿಕ ಸಾರಿಗೆಯನ್ನು ಬಳಸುವಾಗ ಒಬ್ಬ ವ್ಯಕ್ತಿಯು ನಿಜವಾಗಿಯೂ ಹೀಗೆಯೇ ವರ್ತಿಸಬೇಕೇ? ಸರ್ಕಾರಿ ಬಸ್‌ಗಳು ಸಾರ್ವಜನಿಕರಿಗಾಗಿ, ಯಾರೊಬ್ಬರ ವೈಯಕ್ತಿಕ ಆಸ್ತಿ ಅಥವಾ ಖಾಸಗಿ ಸ್ಥಳಕ್ಕಾಗಿ ಅಲ್ಲ. ಎಲ್ಲಾ ಹಂತದ ಪ್ರಯಾಣಿಕರು ಪ್ರತಿದಿನ ಪ್ರಯಾಣಿಸುವ ಸಾರ್ವಜನಿಕ ಸ್ಥಳದಲ್ಲಿ ಇಂತಹ ನಡವಳಿಕೆ ಸಂಪೂರ್ಣವಾಗಿ ಸ್ವೀಕಾರಾರ್ಹವಲ್ಲ. ಇದು ಸರಿಯಾದ ನಡವಳಿಕೆಯಲ್ಲ, ವಿಶೇಷವಾಗಿ ಸಾಮಾನ್ಯ ಜನರ ಅನುಕೂಲಕ್ಕಾಗಿ ಮತ್ತು ಅನುಕೂಲಕ್ಕಾಗಿ ಕಾರ್ಯನಿರ್ವಹಿಸುವ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯಲ್ಲಿ. ಮೂಲಭೂತ ಶಿಸ್ತು, ಜವಾಬ್ದಾರಿ ಮತ್ತು ಗೌರವವನ್ನು ನಿರೀಕ್ಷಿಸಲಾಗುತ್ತದೆ. ಈ ರೀತಿಯ ನಡವಳಿಕೆ ಸರಿಯಲ್ಲ. ಸಾರ್ವಜನಿಕ ಸ್ಥಳಗಳಲ್ಲಿ ಟಿಕೆಟ್‌ಗಳನ್ನು ಎಸೆಯುವುದು ಮತ್ತು ಕಂಡಕ್ಟರ್ ಮತ್ತು ಇತರ ಪ್ರಯಾಣಿಕರೊಂದಿಗೆ ವಾದ ಮಾಡುವುದನ್ನು ಸಹಿಸಲಾಗುವುದಿಲ್ಲ ” ಎಂದು ಕಿಡಿಕಾರಿದೆ.
ಉಚಿತ ಟಿಕೆಟ್‌ ವಿಚಾರದಲ್ಲಿ ಕಂಡಕ್ಟರ್‌ಗಳು ಪರದಾಟ

ಶಕ್ತಿ ಯೋಜನೆ ಆರಂಭವಾದ ಬಳಿಕ ಮಹಿಳೆಯರು ಉಚಿತ ಟಿಕೆಟ್‌ ಪಡೆದು ಮಾರ್ಗ ಮಧ್ಯೆದಲ್ಲಿಯೇ ಬಸ್‌ ಇಳಿದು ಹೋಗುತ್ತಾರೆ. ಇದರಿಂದ ಕಂಡಕ್ಟರ್‌ಗಳಿಗೆ ಸಮಸ್ಯೆಯಾಗುತ್ತಿದೆ. ಟಿಕೆಟ್‌ ಪರಿಶೀಲನೆಗೆ ಅಧಿಕಾರಿಗಳು ಬಂದಾಗ ಉಚಿತ ಪ್ರಯಾಣಕ್ಕೆ ಟಿಕೆಟ್‌ ಪಡೆದ ಮಹಿಳೆ ಇರುವುದಿಲ್ಲ. ಇದರಿಂದ ಕಂಡಕ್ಟರ್ ನೋಟಿಸ್‌ ಪಡೆಯಬೇಕಾಗಿದೆ. ಕೆಲವೊಮ್ಮೆ ಮಹಿಳೆಯರು ಮಾರ್ಗ ಮಧ್ಯೆ ಟಿಕೆಟ್‌ ಕಳೆದುಕೊಂಡು ಹೊಸ ಟಿಕೆಟ್‌ಗೆ ಜಗಳ ಮಾಡುವ ಘಟನೆಗಳು ನಡೆದಿವೆ.