ರೈಲ್ವೆ ಪ್ರಯಾಣಿಕರಿಗೆ ಒಂದೇ ಆಪ್‌ನಿಂದ ಉಚಿತ ಒಟಿಟಿ,ಲೈವ್ ಟ್ರ್ಯಾಕಿಂಗ್, ಇ-ಕೇಟರಿಂಗ್ ಸೇವೆ

ಭಾರತೀಯ ರೈಲ್ವೆ ಈಗ ತನ್ನ ಪ್ರಯಾಣಿಕರಿಗೆ ಮತ್ತೊಂದು ವಿಶೇಷ ಸೌಲಭ್ಯವನ್ನು ಒದಗಿಸಿದೆ. ಇತ್ತೀಚೆಗಷ್ಟೇ ಬಿಡುಗಡೆಯಾದ ‘ರೈಲ್‌ಒನ್’ (RailOne) ಮೊಬೈಲ್ ಅಪ್ಲಿಕೇಶನ್‌ನಲ್ಲಿ ಉಚಿತ OTT ಮನರಂಜನೆ ಸೇವೆ ಲಭ್ಯವಿದೆ. ರೈಲು ಪ್ರಯಾಣದ ವೇಳೆ ಸಿನಿಮಾ, ವೆಬ್‌ಸೀರೀಸ್, ಸಾಕ್ಷ್ಯಚಿತ್ರ, ಆಡಿಯೋ ಕಾರ್ಯಕ್ರಮಗಳು, ಆಟಗಳು ಮತ್ತು ಇನ್ನಷ್ಟು ವಿಷಯಗಳನ್ನು ಪ್ರಯಾಣಿಕರು ಉಚಿತವಾಗಿ ವೀಕ್ಷಿಸಬಹುದು.

‘ರೈಲ್‌ಒನ್’ ಆಯಪ್‌ ಬಿಡುಗಡೆ:

ಈ ಹೊಸ ಅಪ್ಲಿಕೇಶನ್ ಜುಲೈ 1, 2025 ರಂದು ಅಧಿಕೃತವಾಗಿ ಆರಂಭವಾಯಿತು. ಬಳಕೆದಾರ ಸ್ನೇಹಿ ವಿನ್ಯಾಸ ಹೊಂದಿರುವ ಈ ಆಲ್-ಇನ್-ಒನ್ ಆಯಪ್‌ ಪ್ರಯಾಣಿಕರ ಅಗತ್ಯಗಳಿಗೆ ಬೇಕಾದ ಬಹುತೇಕ ಎಲ್ಲಾ ಸೇವೆಗಳನ್ನೂ ಒಟ್ಟುಗೂಡಿಸಿದೆ. ಟಿಕೆಟ್‌ ಬುಕಿಂಗ್‌ ಮಾತ್ರವಲ್ಲದೆ, ಕಾಯ್ದಿರಿಸದ ಯುಟಿಎಸ್‌ ಟಿಕೆಟ್‌ಗಳು, ಲೈವ್‌ ರೈಲು ಟ್ರ್ಯಾಕಿಂಗ್‌, ಕುಂದುಕೊರತೆ ಪರಿಹಾರ, ಇ-ಕೇಟರಿಂಗ್‌, ಪೋರ್ಟರ್‌ ಬುಕ್ಕಿಂಗ್‌ ಹಾಗೂ ಲಾಸ್ಟ್‌-ಮೈಲ್‌ ಟ್ಯಾಕ್ಸಿ ಸೇವೆಗಳನ್ನೂ ಇದರಲ್ಲಿ ಬಳಸಬಹುದು.

ವೇವ್ಸ್ ಒಟಿಟಿ ಜೊತೆಗಿನ ಸಂಯೋಜನೆ:

‘ರೈಲ್‌ಒನ್’ ಅಪ್ಲಿಕೇಶನ್‌ನ ವಿಶೇಷ ಆಕರ್ಷಣೆಯೆಂದರೆ WAVES OTT ಪ್ಲಾಟ್‌ಫಾರ್ಮ್‌ ಜೋಡಣೆ. ಪ್ರಸಾರ ಭಾರತಿಯಿಂದ 2024ರ ನವೆಂಬರ್‌ನಲ್ಲಿ ಪ್ರಾರಂಭವಾದ WAVES OTT, 10ಕ್ಕೂ ಹೆಚ್ಚು ಭಾರತೀಯ ಭಾಷೆಗಳಲ್ಲಿ ವಿಷಯವನ್ನು ಒದಗಿಸುತ್ತದೆ. ಇದರಲ್ಲಿ ಲೈವ್‌ ಟಿವಿ, ಬೇಡಿಕೆಯ ಮೇರೆಗೆ ವೀಡಿಯೊಗಳು, ಆಡಿಯೋ, ಗೇಮಿಂಗ್‌ ಮತ್ತು ಇ-ಕಾಮರ್ಸ್‌ ಎಲ್ಲವೂ ಒಂದೇ ಸ್ಥಳದಲ್ಲಿ ಲಭ್ಯ.

ಪ್ರಾದೇಶಿಕ ಭಾಷೆಗಳಿಗೂ ಪ್ರಾಮುಖ್ಯತೆ:

ಭಾರತದ ಭಾಷಾ ಹಾಗೂ ಸಾಂಸ್ಕೃತಿಕ ವೈವಿಧ್ಯತೆಯನ್ನು ಗಮನದಲ್ಲಿಟ್ಟುಕೊಂಡು, WAVES OTT ತನ್ನ ವಿಷಯವನ್ನು ಹಲವು ಭಾರತೀಯ ಭಾಷೆಗಳಲ್ಲಿ ಮತ್ತು ಉಪಭಾಷೆಗಳಲ್ಲಿ ಒದಗಿಸುತ್ತದೆ. ಇದಕ್ಕಾಗಿ ಪ್ರಾದೇಶಿಕ ಪ್ರಸಾರಕರು, ವಿಷಯ ರಚನೆಕಾರರು ಹಾಗೂ ಸಾಂಸ್ಕೃತಿಕ ಸಂಸ್ಥೆಗಳೊಂದಿಗೆ ಸಹಕಾರ ಮಾಡುತ್ತಿದೆ.

ಉಚಿತ OTT ಸೇವೆಯನ್ನು ಹೇಗೆ ಬಳಸುವುದು?

ರೈಲು ಪ್ರಯಾಣದ ಸಮಯದಲ್ಲಿ ‘ರೈಲ್‌ಒನ್’ ಅಪ್ಲಿಕೇಶನ್‌ನಲ್ಲಿ ಉಚಿತ OTT ಸೇವೆ ಪಡೆಯಲು ಈ ಹಂತಗಳನ್ನು ಅನುಸರಿಸಬಹುದು..

mPIN ಅಥವಾ ಬಯೋಮೆಟ್ರಿಕ್ ಮೂಲಕ ‘ರೈಲ್‌ಒನ್’ ಆಯಪ್‌ಗೆ ಲಾಗಿನ್‌ ಆಗಿ.
ಮೆನುದಲ್ಲಿ ‘ಇನ್ನಷ್ಟು ಕೊಡುಗೆಗಳು’ ವಿಭಾಗದಲ್ಲಿ ‘WAVES‌ಗೆ ಹೋಗಿ’ ಆಯ್ಕೆಮಾಡಿ.
ಹೊಸ ಪುಟದಲ್ಲಿ ಸಿನಿಮಾ, ಪ್ರದರ್ಶನ, ಸಾಕ್ಷ್ಯಚಿತ್ರ ಮತ್ತು ಇತರೆ ಉಚಿತ ವಿಷಯಗಳನ್ನು ತಕ್ಷಣ ವೀಕ್ಷಿಸಬಹುದು.
ಒಂದು ಅಪ್ಲಿಕೇಶನ್..ಅನೇಕ ಸೌಲಭ್ಯಗಳು:

ರೈಲ್ವೆ ಮಾಹಿತಿ ವ್ಯವಸ್ಥೆಗಳ ಕೇಂದ್ರ (CRIS) ನಿರ್ಮಿಸಿರುವ ‘ರೈಲ್‌ಒನ್’ ಆಯಪ್‌, ಅಸ್ತಿತ್ವದಲ್ಲಿರುವ RailConnect ಮತ್ತು UTS ಖಾತೆಗಳನ್ನು ಸಹ ಬೆಂಬಲಿಸುತ್ತದೆ. ಒಂದೇ ಅಪ್ಲಿಕೇಶನ್‌ನಲ್ಲಿ ಟಿಕೆಟ್‌ ಬುಕಿಂಗ್‌ ಸೇರಿದಂತೆ ಅನೇಕ ಸೇವೆಗಳಿದ್ದರಿಂದ, ಪ್ರಯಾಣಿಕರು ತಮ್ಮ ಮೊಬೈಲ್‌ನಲ್ಲಿ ಹಲವು ಆಯಪ್‌ಗಳನ್ನು ಇನ್‌ಸ್ಟಾಲ್‌ ಮಾಡುವ ಅವಶ್ಯಕತೆ ಇರುವುದಿಲ್ಲ.

IRCTC ಅನುಮೋದನೆ ಹೊಂದಿದ ಆಯಪ್‌:

ಈ ಹೊಸ ಅಪ್ಲಿಕೇಶನ್‌ IRCTC (ಭಾರತೀಯ ರೈಲ್ವೆ ಅಡುಗೆ ಮತ್ತು ಪ್ರವಾಸೋದ್ಯಮ ನಿಗಮ) ಅನುಮೋದನೆ ಪಡೆದಿದೆ. ಆದ್ದರಿಂದ, ಪ್ರಯಾಣಿಕರು IRCTC ಆಯಪ್‌ ಬಳಕೆಯೊಂದಿಗೆ ಜೊತೆಗೆ ‘ರೈಲ್‌ಒನ್’ ಆಯಪ್‌ನಲ್ಲೂ ಸುಲಭವಾಗಿ ಟಿಕೆಟ್‌ಗಳನ್ನು ಬುಕ್‌ ಮಾಡಬಹುದು.

‘ರೈಲ್‌ಒನ್’ ಆಯಪ್‌ ರೈಲು ಪ್ರಯಾಣವನ್ನು ಇನ್ನಷ್ಟು ಆರಾಮದಾಯಕ, ಸುಲಭ ಮತ್ತು ಮನರಂಜನಾಕಾರಕವಾಗಿಸಿದೆ. ಈಗ ಪ್ರಯಾಣದ ಸಮಯದಲ್ಲಿ ಸಮಯ ಕಳೆಯಲು ಸಿನಿಮಾ, ಕಾರ್ಯಕ್ರಮಗಳು ಹಾಗೂ ಆಟಗಳು ಎಲ್ಲವೂ ಒಂದೇ ಆಯಪ್‌ನಲ್ಲಿ ಉಚಿತವಾಗಿ ಲಭ್ಯ. ಇದು ಭಾರತೀಯ ರೈಲ್ವೆಯ ಡಿಜಿಟಲ್‌ ಪರಿವರ್ತನೆಯತ್ತ ಮತ್ತೊಂದು ದೊಡ್ಡ ಹೆಜ್ಜೆಯಾಗಿದೆ.