ಸಮೀಕ್ಷೆಗೆ ಸ್ಟಿಕರ್ ಅಂಟಿಸಲು ಕೊಂಟ್ಯಾಂತರ ರೂ ಖರ್ಚು ಮಾಡಿತ್ತಾ ಸರ್ಕಾರ?

ಬೆಂಗಳೂರು: ಎಸ್​ಸಿ ಒಳಮೀಸಲಾತಿ ಸರ್ವೆಗೆ (Caste Census Survey) ರಾಜ್ಯ ಸರ್ಕಾರ ಆದೇಶಿಸಿದೆ. ಸಮೀಕ್ಷೆ ನಡೆಸಲು ಬಿಬಿಎಂಪಿ (BBMP) ಸಿಬ್ಬಂದಿ ಫೀಲ್ಡ್​ಗೆ ಇಳಿದಿದ್ದಾರೆ. ಸಮೀಕ್ಷೆ ಮುಗಿಸುವ ಭರದಲ್ಲಿ ಎಡವಟ್ಟಿನ ಮೇಲೆ ಎಡವಟ್ಟು ಮಾಡುತ್ತಿದ್ದಾರೆ. ಬೇಕಾಬಿಟ್ಟಿ ಮನೆಬಾಗಿಲಿಗೆ ಸ್ಟಿಕ್ಕರ್ ಅಂಟಿಸುತ್ತಿರುವುದಾಗಿ ಆರೋಪಗಳು ಕೇಳಿ ಬಂದಿವೆ. ಈ ಮಧ್ಯೆ ಸಮೀಕ್ಷೆ ಹೆಸರಲ್ಲಿ ಸರ್ಕಾರ ಕೊಟ್ಯಂತರ ರೂ ಹಣ ವ್ಯರ್ಥ ಮಾಡುತ್ತಿದೆ. ಪಾಲಿಕೆ ಮಾಡುತ್ತಿರುವ ದುಂದು ವೆಚ್ಚದ ಪಟ್ಟಿ ಟಿವಿ9ಗೆ ಲಭ್ಯವಾಗಿದ್ದು, ಬರೋಬ್ಬರಿ 3 ಕೋಟಿ 60 ಲಕ್ಷ ರೂ ಖರ್ಚು ಮಾಡಲಾಗಿದೆ.

ಲಕ್ಷ ಲಕ್ಷ ಹಣ ಖರ್ಚು
ರಾಜ್ಯದಲ್ಲಿ ಎಸ್​ಸಿ ಒಳಮೀಸಲಾತಿ ಸರ್ವೆಗೆ ಸರ್ಕಾರ ಆದೇಶ ಹೊರಡಿಸಿದೆ. ಆದರೆ ಸ್ಟಿಕ್ಕರ್‌ ಅಂಟಿಸುವುದು, ಜಾಗೃತಿ ಮೂಡಿಸುವ ಹೆಸರಲ್ಲಿ ಪಾಲಿಕೆ ಮೂಲಕ ಲಕ್ಷ ಲಕ್ಷ ಹಣ ಖರ್ಚು ಮಾಡಲಾಗುತ್ತಿದೆ. ಪ್ರತಿ ಮನೆಗೆ ಸ್ಟಿಕ್ಕರ್‌ ಅಂಟಿಸುವುದಕ್ಕೆ ತಲಾ 5 ರೂ ನಿಗದಿ ಮಾಡಲಾಗಿದೆ. ಒಳಮೀಸಲಾತಿ ಸಮೀಕ್ಷೆ ಜಾಗೃತಿ, ಬೀದಿನಾಟಕಕ್ಕೆ 49.59 ಲಕ್ಷ ರೂ. ಖರ್ಚು ಮಾಡಲಾಗುತ್ತಿದೆ.

ಇನ್ನು 35 ಲಕ್ಷ ಮನೆಗಳಿಗೆ ಒಂದು ಸ್ಟಿಕ್ಕರ್​ನಂತೆ ಒಟ್ಟು 35 ಲಕ್ಷ ಸ್ಟಿಕ್ಕರ್ ಮುದ್ರಣ ಮಾಡಲಾಗಿದೆ. ಒಂದು ಸ್ಟಿಕ್ಕರ್​ಗೆ 2 ರೂ., 350000×2= 70 ಲಕ್ಷ, ಇದಕ್ಕೆ ಸೇವಾಶುಲ್ಕ 3.50 ಲಕ್ಷ ರೂ., 13.33 ಲಕ್ಷ ರೂ ಜಿಎಸ್​ಟಿ, ಒಂದು ಸ್ಟಿಕ್ಕರ್​ಗೆ 2 ರೂ. 47 ಪೈಸೆ, ಅಲ್ಲಿಗೆ ಪಾಲಿಕೆ ಒಟ್ಟು 86 ಲಕ್ಷ 73 ಸಾವಿರ ರೂ ಖರ್ಚು ಮಾಡಿದೆ.

28 ವಿಧಾನ ಸಭಾಕ್ಷೇತ್ರದಲ್ಲಿ ಆಟೋ ಮೂಲಕ ಪ್ರಚಾರಕ್ಕೆ 7 ದಿನಕ್ಕೆ 11 ಲಕ್ಷ 7 ಸಾವಿರ ರೂ, 5 ಲಕ್ಷ ಭಿತ್ತಿಪತ್ರ ಮುದ್ರಣಕ್ಕೆ 5 ಲಕ್ಷ ರೂ., ಸಾಮಾಜಿಕ ಜಾಲತಾಣ, ಯೂಟ್ಯೂಬ್​​ನಲ್ಲಿ ಜಾಗೃತಿಗೆ 28 ಲಕ್ಷ ರೂ., ಎರಡು ಶಾರ್ಟ್ ಫಿಲ್ಮ್ ತಯಾರಿಗೆ ಕಲಾವಿದರು, ಕ್ಯಾಮರಾ ಮತ್ತು ನಿರ್ದೇಶಕರು ಸೇರಿ ಕೇವಲ 80 ಸೆಕೆಂಡ್ ವಿಡಿಯೋಗೆ 49.56 ಲಕ್ಷ ರೂ ಪಾಲಿಕೆ ಸುರಿದಿದೆ.